Liverpool leh City an mualpho

Pathianni zan Premier League inkhelah Europe-a beisei tur la nei Liverpool leh Manchester City-ten an player ṭha chhawr loin khualmual an pan a, team pahnih hi an mualpho.

Hillsborough chhiatna avanga court thutlukna a chhuah aṭanga an match hmasa berah Liverpool-in khualmualah 3-1 ngawtin Swansea City an hneh lo a, Manchester City chuan khualmualah Sadio Mane ngam loin Southampton lakah 4-2 in an tlawm bawk.

Reds an talbuai

Europa League semifinal first leg-a Villarreal hneh lo hlim Liverpool-in second leg an la khelh leh tur hre ranin Swansea khelmualah player naupang rual an hruai a, Reds first eleven player kum chawhrual zat hi kum 23 niin Premier League chanchina first XI-a player an la hman naupan ber ṭum a ni.

Mahse, Liverpool player naupang rual ten an hun ṭha neih an chhawr thei lo a, kum 18-a upa midfielder Pedro Chirivella chu second half-ah lakchhuah a ngai a, left back Brad Smith chu yellow card pahnih a hmuh avangin hnawhchhuah a ni bawk.

Welsh club-in Andre Ayew leh Jack Cork hmanga goal hnih an khung hnuah Liverpool-in substitute Christian Benteke hmangin goal khat khung ve mah se Reds tlarhnung chet chhiat zarah Ayew-a'n goal khat dang a khung ve leh a, khualmualah Liverpool 3-1 in an tlawm.

Reds-in season tharah Champions League khelh an tum a nih chuan Premier League aṭanga khelh a beiseiawm tawh loh avangin Europa League-a nomawi chawi an tum a ngai tawh ang.

Klopp-a thukhawchang

Liverpool boss Jurgen Klopp chuan, "Player ka siksawi nual a, tun aia ṭha zawka khel thei kan ni. Zaninah hian chak loh kan phu a, Swansea khan hnehtu nih an phu a ni. Ball kan hloh nasa a, game pangngai tak khel ni ila kan chak ang," tiin an chak loh chhanah chhuanlam zawn a tum lo.

Mane-a inlar

Manchester City-in Pathianni zanah Sadio Mane an ngam lo a, Senegalese forward hian hat-trick siamin season thara Europa League khelh beisei Southampton beiseina chhit nun sak turin Manchester City lakah 4-2 in a team a chakpui.

Champions League semifinal second leg Santiago Bernabeu-a la khel tur Manchester City-in an player rinrawl engemaw zat an hahchawlhtir a, Sergio Aguero chuan bench a luahlum bakah hliam damkawr Yaya Toure leh captain Vincent Kompany-te chu squad-ah pawh an awm lo.

Southampton-in Manchester City kim loh chhawr ṭangkaiin minute 30 chhungin Shane Long leh Mane hmangin goal hnih an khung nghal a, City rawlthar duhawm Kelechi Iheanacho chuan chawlhlawk hma hretin si khat a thungrul.

Second half-ah Mane a langsar a, minute 57 leh 58-ah goal khungin hat-trick a siam. Iheanacho-a'n City tan goal khat dang khung ve leh mah se City-in goal an chhuah hnem hret a, awmzia a nei thui tawh lo.

Manchester City tan season thara Cham-pions League khel zel tur chuan an dinhmun a ṭha ta lo hle. Palina dinhmun luah mek City hian khelh khata khel tam zawk chungin an hnuai chiaha awm United aiin point li chiahin an sang tawh a, pathumna Arsenal chu point thumin an phak lo bawk.

City hi lungphang lutuk tur erawh an ni lo. Champions League-ah nomawi chawi an la beisei a, Premier League-ah Arsenal nen an la inhmachhawn dawn bawk avangin tho chhuak leh thei an ni.

Pellegrini thukhawchang

Manchester City manager Manuel Pellegrini chuan, "Ka naute khelh dan khan ka beisei a phak loh em avangin ka lawm lo takzet a, a bik takin defence-a kan khelh dan khan min ti lawm lo takzet a ni. Nilaini zanah Real Madrid nen kan inkhel dawn a, hnehna chang tura inbuatsaih dan ṭha ber chu hnehna chan a nih laiin kan chak zo si lo a ni," tiin a naute khelh danah a lawm loh thu a sawi.