Federation Cup Mizo lansarh zanah Shillong Lajong an chak

Pathianni zan khan Federa-tion Cup match hnih khelh a ni a, Hero of the Match atana Isaac Vanmalsawma thlan a nih zanah Shillong Lajong chuan 2-1 in East Bengal an hneh a, inkhel dangah Sporting Goa chuan 1-0 in khualmualah Mumbai FC an hneh bawk.

Lajong chakna Isaac

Shillong Lajong-in I League match hnuhnung bera an hneh hnu East Bengal an mikhual a, Shillong khawpuia 1-0 a Lajong-in hnehna an chan ṭuma Hero of the Match Isaac Vanlalmalsawma bawk a langsar a, Hnahthial rawlthar hi East Bengal tlarhnung chhaih mangangtu niin goal khung lo mah se Hero of the Match-ah thlan a ni.

Nehru Stadium, Guwahati-a inkhelah ṭan aṭanga rei lo teah Lajong-in chance ṭha nei mah se an hun ṭha neih hi Fabio Pena chuan goal-ah a chantir thei lo. Minute 12-naah Isaac Vanmalsawma'n hun ṭha a neih chhunzawm a, mah se Lajong rawlthar duhawm hian awlsam taka khung theih nia langah bar chung lamah ball a pet chhuak.

Minute 33-naah Lajong-in goal an khung ta nge nge a, Konsham Chinglensana Singh chuan Bipin Singh-a corner pet aṭanga ball lokal chu a tauh lut.

East Bengal-in awlsam taka tlawm an tum lo. Tun hnaia ngaiawh chho leh mek South Korean striker Dong Hyun-Do chuan minute 44-naah an si phurh sutna goal a khung ve lehnghal.

Second half-ah Lajong bawk an chungnun chhunzawm a, Bipin Singh leh Isaac Van-malsawma-te mawi taka an in one-two hnuah Hnahthial rawlthar hian goal-ah a shot a, a per lehlam dawngtu Fabio Pena chuan goal-ah a chantir. East Bengal-in nawr let nghalin Lalrindika Ralte chuan goal khungna hun ṭha nei mah se a chhawr ṭangkai thei lo.

Hun tawp nan minute 15 chiah a awm tawh thin Lajong tan Samuel Lalmuanpuia 'n woodwork a pet per a, Zoding-liana Tochhawng ball cross
ṭha tak chu Bipin Singh chuan goal-ah a chantir thei lo bawk. Hun tawp thlengin goal dang a lut tawh lo a, Lajong-in 2-1 in hnehna an chang.

Mizo an langsar

Shillong Lajong leh East Bengal inkhelh zan-ah Meghalaya club tan Mizo tlangval Zoding-liana Tochhawng, Isaac Van-lal-malsawma leh Samuel Lal-muanpuia ten inkhel bul an ṭan vek a, East Bengal tan S. Mal-sawmtluanga leh Lalrindika Ralte-te chuan inkhel bul an ṭan bawk.

Mumbai an tlawm

Mikhual chak harsatna hmun Cooperage Stadium, Mumbai-ah Sporting Clube de Goa-in an theihna pholangin Mumbai FC chu 1-0 in an hneh a, he inkhela goal awmmchun hi Sumeet Passi khung a ni.

Sporting Goa tan an chak mai bakah chanchin lawmawm dang a awm a, Densill Theobald chu rei tak a hliam vanga a chawlh hnuah Flaming Oranje tan hian a inlan.