Champions League khel tur Villarreal

Pathianni zan khan La Liga inkhelah Villarreal chuan Valencia 2-0 in an hneh a, season thara Champions League khel turin an dinhmun an sawh nghet.

League match hnih chauh khelh tur awm tawhah Europa League se-mifinal first leg-a Liverpool hnehtu club hian palina dinhmun an luah chiang tawh a, pangana Athletic Bilbao tan umphak theih an ni tawh lo.

Villarreal manager Marcelino Garcia Toral-a'n Liverpool nen Europa League semifinal second leg an la khelh tur hre reng chungin player ṭha chhawr lo mah se Reds an hneh ṭuma inlan zinga inkhel awmchhun Roberto Soldado chu team chakpuitu a ni.

First half-ah Villarreal hian 2-0 in hma an hruai der tawh a, goal khungtu Samu Garcia leh Adrian Lopez-te goal khung hi Spurs striker hlui Soldado siamsak ve ve niin a team tan a thawhhlawk hle.

Villarreal tan pathumna Real Madrid umphak theih an nih tawh loh avangin an dinhmun a chiang tawh a, season thara Champions League khel tur club hian Europa League lamah an rilru zawng zawng an pe thei tawh ang.