Ajax leh PSV inum tawk

Netherlands league 'Eredivisie'-ah champion tumin Ajax leh PSV Ein-dhoven an inum tawk hle a, point 81 ve ve hmuin match khelh hmabak pakhat ṭheuh chiah an neih tawh avangin champion tur zawk a la hriat loh. Ajax hian goal difference hmangin hma an la hruai hram.

Kartawp inkhelah Ajax hian hun tawp hma minute 10 chauh a awm tawh tihah goal thum an khung a, an mikhual FC Twente chu 4-0 in an sawp. Ajax tan Vaclav Cerny chuan minute 37-naah goal hmahruai khungin Mike van der Hoorn (80), Viktor Fischer (82) leh Amin Younes (86) ten goal an khung zui bawk. Kum 1991 hnua a vawi khat nan Ajax hian minute 80 hnuah goal thum an khung.

Inkhel dangah PSV an nep bik lo a, an mikhual Cambuur lakah ṭhat chhuah bik loin 6-2 in an lo sawp ve bawk.

May 6 zan dar 6:00 hian team pahnih te hian tun season-a an league match hnuhung ber an khel ve ve dawn a, Ajax hi De Graafschap khelmualah an leng lut ang a; PSV pawh Zwolle hmachhawn turin an zinchhuak ang.