Mumbai chakna Rohit Sharma bawk

Pathianni zan Indian Premier League-ah inkhel pahnih a awm a, inkhel pakhat zawkah Mumbai Indians chak nan run 85 siamtu Rohit Sharma a langsar hle.

Inkhel hmasa zawkah Gujarat Lions chuan wicket ngain Kings XI Punjab an hneh a, run 74 siamtu Aaron Finch chu Lions tana player langsar ber a ni.

Punjab Cricket Association Sta-dium, Mohali-a inkhelah bat hmasa zawk Kings XI-in over 20-ah run 161 siamin mi paruk an hloh a, run 42 siamtu Murali Vijay chu run siam hnem ber a ni.

Gujarat Lions-in over 17.4-ah mi panga chiah hlohin an tar-get an umpha nghal a, ball 47 a hmachhawna run 74 siamtu Aaron Finch-a'n a khelh ṭhat bakah run 41 siama a tawp thleng dam Dinesh Karthik-a'n a pui ṭha hle bawk.

Pathianni zan inkhel hnuhnung zawkah Mumbai Indians chuan wicket riatin Rising Pune Supergiants an hneh a, Maharashtra Cricket Association Stadium, Pune-a inkhel-ah mualneitu team an hawihai.

Bat hmasa zawk Supergiants-in over 20-ah run 159 an siam a, mi panga an hloh. Pune batsman zingah Saurabh Tiwary (57 runs) leh Steven Smith (45 runs)-te chu player langsar an ni a, an ṭhiante puihna erawh an hmu ṭha tawk lo.

Mumbai Indians bowler zingah Jasprit Bumrah chuan over li a vawmah run 29 lek pein wicket thum a la a, kum 22-a upa bowler hi Pune batsman-ten an ngam lo hle.

Mumbai bat hun a thleng a, captain Rohit Sharma chuan ball 60 a hmachhawnah run 85 siamin a tawp thleng a dam a, mikhual team chakna a ni. Jos Buttler chuan a tawp thleng damin ball 17-a hmachhawnah run 27 a vaw chhuak bawk a, Rohit Sharma a thlawp ṭha hle.