2014 - OUT 2015 - OUT 2016 -? Bayern 0-5 Real Bayern 3-5 Barca Bayern 0-1 Atletico. Guardiola enkawl Bayern tawpna semifinal?

Pep Guardiola-a'n German club Bayern Munich a zawm hnua UEFA Champions League-a a thlen chin chu semifinal a ni. Spanish manager hian season hnuhnung pahniha Spanish club Real Madrid leh Barcelona laka a tlawm hnuin tun season-ah Vicente Calderon-ah Atletico Madrid lakah goal khatin an chak lo a, zanin hian Bayern an tho chhuak lo a nih chuan Guardiola hian Germany-ah a hna zo loin season tharah Manchester City a pan dawn tihna a ni.

Zanin dar 12:15 hian Allianz Arena-ah Bayern Munich leh Atletico Madrid ten UEFA Champions League semifinal an khel dawn. Guardiola hnuaiah Bayern-in game mawi an khel a, Atletico-in Diego Simeone kaihhruaiin game hmuhnawm an khel a, football inelna sanga club ṭha pahnih intawng tur hi Ten 2-ah a en theih ang.

Defender an dam

Bundesliga-ah Bayern Munich-in Borussia Monchengladbach an draw vangin nomawi la chawi rih lo mah se defender Jerome Boateng chu January 22 hnuah a rawn kir a, Arjen Robben leh Holger Badstuber te erawh an la inlan thei lo ang.

Guardiola chuan Champions League thlir ranin Xabi Alonso, Javi Martinez, Philipp Lahm, David Alaba, Arturo Vidal, Thiago Alcantara, Douglas Costa leh Robert Lewandowski te chu Gladbach an hmachhawn ṭum hian a awltir.

Atletico lam tan defender pawi-mawh Diego Godin leh Yannick Car-rasco te chu Pathianni khan Ger-many-a zin turin an dam ṭha tih finfiah a ni a, Argentine manager tan Uruguayan defender dam hi thu lawmawm a ni.

Saul-a Goal

Kar liam ta khan Vicente Calderon-ah Atletico Madrid-in an mikhual Bayern Munich chu 1-0 in an hneh a, goal awm chhun hi Saul Niguez thun a ni. Spanish midfielder hian minute 11-na lekah Bayern Munich player hming langsar Thiago Alcantara, Juan Bernat, Xabi Alonso leh David Alaba te a bum hnuah German keeper Manuel Neuer ban phak lohin a pet goal.

Goal khat nei chungin Atletico-in Bayern an tlawh dawn a, Spanish club tan final thleng turin draw result a tawk. Germany-ah Diego Simeone nauten goal an khung thei a nih phei chuan Guardiola hoten final thleng turin goal hnih tala an chak a ṭul ang.

Hlauhthawnna

Bayern Munich-in Jupp Heyn-ckes hnuaia Champions League nomawi an chawi hnuah Spanish manager Guardiola hnuah semifinal ṭum hnih an thleng.

Kum 2014-ah Bayern Munich-in Santiago Bernabeu-ah Real Madrid 1-0 in an hneh lo a, Ger-many-ah lehthal theih beisei mah se 4-0 ngawtin an tlawm.

Kum 2015-ah Guardiola-a'n a club hlui Barcelona a hmachhawn a, Nou Camp-ah Spanish manager hi mualphoin Catalan club lakah 3-0 in an tlawm. Allianz Arena-ah Bayern hi 3-2 in chak leh mah se final erawh an thleng pha chuang lo.

Guardiola hi coach ropui tak a ni nachungin khualmualah record a nei ṭha lo, semifinal first leg-a Atletico hmaa a tlawm hma hian Juventus (2-2) leh Benfica (2-2) te chu khualmualah an hneh zo lo ve ve. Tun season chauh a ni lo, UCL knockout stage chinah Bayern-in Emirates Stadium-a Arsenal an hneh hnuah a zawnin match riat chhung chu khualmualah chak hmel an hmu tawh lo.

Bayern leh Guardiola hian final thleng tur chuan an muala an record ṭha an chhunzawm a ngai a, amaherawhchu Atletico laka goal khat khung ringawt pawh hi hna hautak a ni. Spanish club hian ni 10 chhungin Athletic Bilbao, Malaga, Bayern Munich leh Rayo Vallecano te chu 1-0 vekin an hneh a, Los Rojiblancos hian match ruk chhung a zawnin goal an chhuah tawh lo a, a zawnin vawi sarih an chak tawh bawk. Slovenian keeper Jan Oblak hian April thla tira Espanyol an hmachhawn hnuah goal a chhuah leh tawh lo a, darkar 10 chhuang goal chhuah tawh lo Atletico keeper hian tun season match 24-ah goal a chhuah lo.

German club hlauhthawnna belh-chhahtu chu Robert Lewan-dowski a ni. Polish striker hian match li chhung goal a khung tawh lo a, Champions League bikah Juventus lama a pet goal hnuah Benfica leh Atletico lamah goal a khung lo.

Hlawhchham?

Atletico hneh loh zawhah Pep Guardiola chuan, "Mi zawng zawngin hlawhchham angah min ngai a, mah se match khat khelh tur a la awm a, beisei tur a la awm. Final hi kan thleng lo a nih chuan ka hlawmchham tih in ziak thei ang, mah se kan la tla lo," tiin journalist te chu a cho hle.

First leg-ah Thomas Muller chu bench-ah a ṭhut avangin a lungawi lo a, German forward hi kartawpa Gladbach an draw ṭumin starting eleven-ah dah a ni a, chak zo lo mah se Bayern goal khungtu a ni.

Kum 26-a upa forward Muller chuan, "Tun hnaiah kan team-in hloh kan nei a, result ṭha kan nei lo tih phat tur a awm lo. Kan tihsual aṭangin kan inzir ang a, Atletico kan hneh hunah chuan kan hloh chu kan hmu let leh tur a ni," tiin Gladbach an draw zawhah a sawi.

Bayern president Karl-Heinz Rummenigge chuan, "Kan fana 70,000 te nen kan theihna zawng zawng kan chhuah dawn a, hei hi Milan-a final kan thlen theih nan a tawk ngei ka beisei," tiin a sawi ve bawk.

Atletico coach Diego Simeone chuan, "Munich-ah chuan ṭantu an nei dawn a, mah se keini lam pawhin away goal kan khung thei tlat," tiin goal khung hlutna a hrechiang hle.

Bayern hian European Cup vawi nga an chawi tawh zinga a hmasa ber chu kum 1974 khan Atletico hnehin an chawi a, kum 42 hnuah Spanish manager hnuaiah German club-in Spanish club hneh an tum ang.