Leicester tan nghah a ṭul

Pathianni zan khan Old Trafford-ah Premier League champion nih beiseiin Leices-ter City an lenglut a, Manchester United lakah point khat bak an hlawhchhuah loh avangin Claudio Ranieri hoten an duhthusam ram an la thleng lo.

Stamford Bridge-ah nizan khan Chelsea leh Tottenham Hotspurs an inkhel a, London Derby-ah Mauricio Pochettino nauten point thum an hmu lo a nih chuan Foxes an champion ang. Spurs hi chak ta reng pawh ni se May 7 zanah Leicester City-in King Power Stadium-ah Everton an hneh chuan an mual ngeiah champion nomawi an chawi thei ang.

Schmeichel pakhat zawk

Manchester United tan Peter Schmeichel chu legend a ni a, Danish keeper fapa Kasper Schmeichel hian Old Trafford-ah a pa inkhel hi a thlir ṭhin. Kasper hian United khelmuala player anga a inlan hmasak berah a pa Peter-a'n a thlir ve thung a, United legend Eric Cantona-a'n a en bawk.

Kum 29-a upa Kasper hian minute 8-na lekah vengtu nei lo Anthony Martial pet chhuah mah se goal dang a chhuah tawh lo. Danish keeper hi Foxes tan player pawimawh an ni a, Jesse Lingard goal khung tur a dang ṭha hle.

Captain Morgan

Minute 17-naah Leicester captain Wes Morgan-a'n tharum hmangin Marcos Rojo lakah a tal put a, goal pawimawh a tauh lut. Foxes defender hian corner aṭang bawkin goal khung belhna tur nei mah se goal zawnah a tauh thei lo a, goal dang lut tawh loin 1-1 in an inhnehtawk.

Old Trafford-a inkhelah hian United youth system chhuak Danny Drinkwater chu vawi hnih yellow card hmuh vangin minute 86-naah hnawh chhuah a ni a, player 10 a khel Foxes an ṭang tluan hram.

An lawm tho

Leicester manager Ranieri chuan, "Inkhel harsa tak a nih avangin helai hmunah hian champion nemngheh kan tum lo. Inkhelh ṭantirh minute 15 chhung kha chu kan hlauthawng hman viau a, kan tan chuan draw hi result ṭha a ni," tiin an result-ah an lungawi a ṭul thu a sawi.