Leverkusen leh Alonso - An hnathawh a ropui e!
German football-a roreltu chu Bayern Munich an ni a, season 11 chhung an champion zawn tawh. Xabi Alonso leh a kaihhruai Bayer Leverkusen-in German football roreltu hi an lalṭhuthleng aṭangin an paih thla a, an club history-a a vawi khat nan Bundesliga-ah an champion.
Pathianni zan khan BayArena-ah Leverkusen-in Werder Bremen 5-0 in an sawp a, match nga khelh hmabak nei chungin champion an nemnghet. Alonso leh a hote hnathawh hi a ropui a, thua sawifiah chi a ni lo.
5 Star Leverkusen
Season liam ta khan Borussia Dortmund-in champion-na hun ṭha an nei a, match tawp bera an chetsual avangin nomawi an thlauh. Leverkusen erawh Dortmund ang ngawt an ni lo, champion theihna hun ṭha an neih hmasak berah champion a nemnghet.
BayArena khat tlatin mipui an pungkhawm a, Leverkusen-in football mawina pholangin goal an khung tel bawk. Ṭan phat aṭangin Bayer an hmuhnawm a, Jonas Hofmann-a'n Julián Malatini lakah penalty a hlawh chhuak. Minute 25-naah Victor Boniface rawn pen chhuakin goal hmahruai a khung.
First half-ah goal khung belh lo mah se an goal bawh chu na tak a ni. Second half-ah erawh an ke a hmui tawh a, goal an inkhungsiak a ni ber. Arsenal aṭanga Leverkusen pantu Granit Xhaka chuan minute 60-naah box pawn aṭangin mawi zetin a pet goal. Swiss midfielder hi midfield-a Leverkusen innghahna a ni.
Leverkusen game tifamkimtu tia sawi theih Wirtz-a'n a theihna a pholang zui a, German footballer ṭha mi hian box pawn aṭangin minute 68-naah ṭha zetin a pet lut. Minute 83-naah offside trap bumin Wirtz-a'n a pet goal leh a, mipui pawh an insum zo tawh lo - fan ṭhahnem tak khelmualah an lut.
Minute 90-naah chuan halmawi khu nen khelmual pawh a lang chiang tawh lo. Wirtz-a'n Leverkusen goal ngana a khung a, hattrick hmasa ber a ni bawk. Mipui an sahawk tawh a, mualah an tlan lut nghal. Referee-in 'dan chu dan' a ti lo, thil thlen dan hrethiam tak chungin minute 90-na a ni tawh bawk nen 'final whistle' a ham ri. Leverkusen lawmna hi a taka tem ve lo tan chuan sawifiah ngaihna a awm lo a, suma lei theih a ni lo - hei tak hi football ropuina a chu a ni.
A ropui e
Xabi Alonso-a'n October 2022 khan Leverkusen hi a zawm a, relegation zone-ah an awm. Season a tawp meuh chuan point 50 hmuin paruknaah an awm a, Europa League an khel pha hial.
Alonso hnathawh ropui hi khawvelin an hre tawk lo. Tun season-ah Alonso leh a hote hian hneh loh an la tawng lo a, match 43 chhung an kal tluang tawhin Europe league sang panga zingah Juventus record (May 2011-May 2012) an nih rual. An khum a rinawm!
Leverkusen hian Bundesliga an champion tawh a, DFB Pokal-ah final an lut tawh a, Europa League quarterfinal first leg-ah West Ham 2-0 in an hneh. Alonso hote hi nomawi pathum chawi thei dinhmunah an ding a, hneh loh tawng loa season hmang tluan thei dinhmunah an ding bawk.
