Champion ngam lo Arsenal leh Liverpool?

Premier League champion lai Manchester City an chak tih hre sa chungin, an hnuaia awm Liverpool leh Arsenal te an inlan - Reds leh Gunners hi an tlawm ve ve, pathumna ni chunga kartawp hmangtu Citizens chuan a chung bera awm chungin kar thar an hmang.

Anfield-ah ngei mai Jurgen Klopp leh a naute chuan Crystal Palace 1-0 in an hneh lo, goal awmchhun hi Eze-a'n minute 14-na leka a khung a ni a, mualneitu lamin sut tumin bei ngial mah se an thei lo; kum 2022 October thla hnua a vawi khat nan anmahni khelmuala league match an khelh bikah an tlawm.

Liverpool an chak loh avangin Arsenal ṭantute an phur, a chhan chu Mikel Arteta naute hian Aston Villa an hneh chuan Reds chunga awmin EPL hmahruaitu an nih theih dawn vang a ni, mahse North London club hi Villa chuan 2-0 in an hneh daih.

Man City, Reds leh Gunners te hian league match khelh hmabak paruk ṭheuh an la nei, vawi khat chetsual lekah an dinhmunn a la inthlak kual vek thei bawk. English football inelna sang ber champion nih tuma inum boruak a sang zel dawn.

Anfield a ngui

A tirah Liverpool tlarhnung an chesual, box chhungah ven lohin Eze an dah - ani hian Tyrick Mitchell siamsak chu awlsam takin a khung a, a hnuah Virgil van Dijk chetsual vangin Jean-Philippe Mateta chuan a khung leh teuh hle, goal line aṭangin Andy Robertson-a'n a pet chhuak hman.

Reds lamin na takin an bei let - Wataru Endo chuan hnai tak aṭangin bar a tih per a, forward Luis Diaz, Darwin Nunez, Mohamed Salah leh Diogo Jota te pawhin hnai tak aṭangin an hlah vek. Palace keeper Dean Henderson a ding khawng tlat.

Kar laihawl inkhelah Klopp-a'n a player ṭha ṭhenkhat dahṭha chungin Atalanta a mikhual a, si thum fai 3-0 in an chak lo. EPL-ah an tlawn zui a, kar khat chhungin nomawi pahnih hloh mai thei dinhmunah an ding hman, beiseina erawh an la nei thei ang.

Reds defender Robertson chuan, "League match khelh hmabak paruk kan la nei, hengah te hian kan theihna zawng zawng kan hlan ang, team ṭha lutuk pahnih dang nen kan inel avang erawh chuan a awlsam dawn lo," a ti a, champion thei an la nih thu a sawi bawk.

Arsenal zia

Phurin beisei han nei sang viau mah se Arsenal hian a vawr tawp boruak an zo lo ṭhin, kuminah pawh chu thil chu thleng leh thei dinhmunah an ding mek. Aston Villa hneha dinhmun siamṭhat theihna an neih laiin Leon Bailey leh Ollie Watkins te an ngam lo.

Arteta-a'n tlarhma laiah Gabriel Jesus a dah a, Brazilian forward hian Villa tlarhnung a ti buai phak lo - tunlaia a hman thiam tak Kai Havertz chu a pawthnung a, ni dang angin Arsenal goal nawr a na tawk lo, a hnung lamah Oleksandr Zinchenko a nemin Gabriel a chesual leh zauh ṭhin bawk.

Gunners hian manager atan an duh loh Unai Emery-a thluak an ngam lo tiin a sawi theih a, inkhelhna hmun an pek tam theih loh Emiliano Martínez chu an champion kalkawng dangtu a ni thei bawk. Goal a luh hmain Martinez hian Leandro Trossard khung tur chu hnai zetah a lo dansak a ni.

Arsenal midfielder Declan Rice chuan, "Inelna a la tawp lo, tunah hian dinhmun ṭha takah kan la ding. Premier League-ah chuan thil mak tak tak a thlen chang a awm," a ti. Arteta naute hi kum 2024 bika an chak loh vawi khatna chauh a ni, chutihrualin hun pawimawh laia chak loh a pawi ṭhin.