Dortmund khelmualah Atletico an leng dawn

Champions League quarterfinal second leg-ah zanin dar 12:30 hian Borussia Dortmund chuan Atletico Madrid an mikhual dawn a, first leg-ah 2-1 a an tlawm tawh avangin German club tan tlang turin an theihna zawng zawng nena beih a ṭul tawh.

Dortmund coach Edin Terzic chuan, "Kan khelmualah eng hna nge kan thawh ngai tih chu kan hre tawh a ni," a ti a, first leg-ah chak zo lo mah se khualmuala an match chu an tan enchhinna a nih thu a sawi a, zaninah chak an tum dawn.

German club hian fans 80,000 chuang lenna Westfalenstadion-ah Atletico hi an lo mikhual dawn a, Atletico lakah fans puihna nen hnehna chan an inbeisei ang - league-ah Borussia Mönchengladbach chu 2-1 in an hneh a, Karim Adeyemi hnawhchhuah vangin kim loin an khel mah mah!

Dortmund hian November 2021 aṭang khan an mualah European football match-a tlawm an la nei ngai lo a, Manchester City, Chelsea, AC Milan, Paris Saint-Germain leh Newcastle United te an mikhual zingah an tel tawh tih hriat phei chuan Atletico tan zuam chi an ni lo tih a lang chiang.

Tun season-a an Champions League zinkawng hi en ila, Dortmund hi an zuam awm lo hrim hrim - PSG, AC Milan leh Magpies te nen group khata awm chungin group hmahruaitu an ni thei a, last 16-ah PSV Eindhoven an paltlang bawk.

Tun season-a goal 12 khung tawh Niclas Füllkrug leh goal 13 khungtu Donyell Malen te Dortmund tan an pawimawh dawn a, first leg-a bench aṭanga a luh hnua inkhel boruak thlak danglamtu Julian Brandt pawhin bul ṭan a phu viau - defensive thiam hmingthang Atletico laka Dortmund goal nawr dan tur hi hriat a châkawm tawh.

Spanish club Atletico hi defensive an thiam vanga fak hlawh ni mah se, tlarhmaah player an nei chhe lo - Antoine Griezmann leh Álvaro Morata an inkawp ṭhin a, anni pahnih hi European football-a striker inkawp 'hot' ber pawl an ni mek.

Griezmann hian tun season inelna hrang hrangah match 41 khela goal 21 khungin, assist vawi riat a nei a, Morata hian match 43-a goal 20 khungin assist vawi li a nei bawk - Dortmund tan tlarhnung ven ngaihthah a thiang lo tihna a ni.

French forward Griezmann chuan, "Semifinal thleng turin theihna kan nei a, chu chu khelmualah pawh kan lantir," a ti a, a inringtawk hle - Atletico hian Dortmund an hneh hnuah, league match-ah 3-1 in Girona an hneh.