Thawnthu her danglam tumtu Enrique

Barcelona tana treble nomawi lo chawi tawhtu Luis Enrique-a'n, "Xavi aiin Barcelona nihna ka phawkchhuak zawk," tiin a lo sawi tawh a, mahse, he thu a sawi hnu lawk hian a club hlui lakah Paris Saint-Germain chu 3-2 in a tlawmpui.

Enrique leh a naute tlawmna hi Champions League quarterfinal first leg a ni a, zanin dar 12:30-ah second leg khel turin Barca hi an lenchilh leh dawn - Enrique-a tan a pawimawh lehzual.

Spanish coach hian Barcelona a enkawl laiin treble nomawi meuh lo chawi tawh mah se, Catalan club a chhuahsan hnuah beisei angin a hlawhtling zui lo. Spain national team a enkawl a, Nations League final a hruai thleng a, Euro 2020 semifinal lutin, World Cup 2022-ah round of 16 aṭangin petchhuah a ni bawk.

Chelsea nen pawha sawi zawm hlawh hman coach hian July 2023 khan PSG hi a zawm a, an la chawi ngai loh Champions League nomawi a chawipui thei a nih chuan Paris khawpuiah ngaihsan a hlawh ang a, coach ropui zingah chhiar tel leh a ni bawk ang - chumi tur erawh chuan zaninah Barca a paltlang phawt a ngai.

Mahse, Barca hian chuti maia awlsama PSG hi tlang tir an tum dawn bik lo. Coach Xavi chuan an league match hnuhnung berah PSG nena an intawnna inkhel aṭangin player pariat ngawt a thlak danglam a, French club hmachhawn turin a team a puahchah.

Catalan club hi an ṭhat dan ber erawhin an inrem thei dawn lo. First leg-a chakna goal khungtu Andreas Christensen chu hrem vangin a inlan thei dawn lo a, Sergi Roberto a inlan thei dawn lo bawk.

Joao Cancelo, Inigo Martinez leh Robert Lewandowski te chu hrem vangin kartawp league-ah an inlan lo a, zaninah erawh an lo kir dawn. First leg-a goal hnih khungtu Raphinha a inlan leh ngei ang a, kum 16 mi Lamine Yamal pawh mipui mit fukna a ni leh dawn.

Cadiz laka chawlh hahdamtir Ilkay Gundogan leh Ronald Araujo pawh bul ṭan tura beisei an ni a, Jules Kounde a awm bawk. Kum 17 mi Pau Cubarsi chu tlarhnung laiah ding leh tura rin a ni a, ani pawhin en bik a hlawh leh ang.

PSG tan tlarhmaah Kylian Mbappé-a'n mawhphurhna a lak a ṭul a, kum 25 mi forward hian World Cup nomawi hial chawi tawh mah se, Champions League-a champion nawmzia a la tem lo - Barca laka a team a chakpui a nih chuan, a club zawm tur Real Madrid fan-ten an ngainat belhchhah ang.

A club hlui hmachhawn turin Ousmane Dembélé a kir dawn a, French forward hian khual ṭha thlena an lo thlen a beisei dawn lo - ani pawhin a club hlui velh hi a châk dawn! A vanneihna chu Nou Camp chei ṭhat mek a nih avangin tun season-a Barca khelmual hawh Olympic LLuis Companys stadium-a an inkhel tur chu a ni.

Kum 2017 khan Champions League comeback ropui ber pawlah Barca hian 6-1 in PSG an lo hneh tawh a, khatihlaia Barca boss chu Enrique a ni - tunah chuan Spanish coach tan thawnthu her danglam hun a thleng a, thei tak ang maw?