Monte Carlo lalpa Tsitsipas

Stefanos Tsitsipas chuan Monte Carlo Masters chu atan hmun ṭha a ni tih a takin a lantir leh ta, tun hnai kum li chhunga a vawi thum nan a champion.

Pathianni zana khelh zawh tak final hmuhnawmah Tsitsipas hian Casper Ruud chu 6-1, 6-4 in a hneh, set khatna bik la tur phei chuan minute 36 bak hun a hmang lo. Set hnihnaah pawh 4-4 a nih laia a khingpui service chhuhsakin a dingchang leh ta zawk a ni.

Tsitsipas chuan, "Ka tan chuan kumin hi season ṭha tak a ni lem lo, he hmunah erawh hi chuan harsatna karah pawh lawmna tur hi ka tawng leh mai ṭhin. Min thlawptu ka chhungte leh ṭhiante hi ka tan an hlu ṭhin, dawhsan ka lawn theih chhan pawh an ni chiang hle.

"Tu pawh hian inkhelh nuam tihna leh thiamna kan nei a, ka tan chuan Monte Carlo aia hmun nuam dang hi a awm thei tawh chuang lo ang, a vawi thum nana champion phei chu a hlu zual takzet a ni," tiin a sawi.

Kum 25 mi Tsitsipas tan tournament ṭha tak a ni tiin a sawi theih, nomawi inchuhna inkhelah hian tunlai player ṭha Ruud a hneh a ni satliah lo - final kalkawngah hian player ṭha dang Alexander Zverev leh Jannik Sinner te a hneh bawk.