Khelmuala tlu Ndicka dinhmun a ṭha

AS Roma defender Evan Ndicka chu Pathianni zana Udinese nen an inkhelh laiin khelmualah a tlu a, damdawi in panpui a ngaih avangin an inkhel chhunzawm thei lo. Tunah erawh ngaihtuahawm lohin a dinhmun a ṭha leh tawh a ni.

Minute 72-naah Ndicka hi lungphuchawl vangin a tlu a, khelmual aṭanga zawn chhuah niin damdawi in an panpui nghal. A tluk lai hian team pahnih te 1-1 in an inhnehtawk mek a, vanduaina a thlen hnuah erawh an khel chhunzawm ta lo.

Roma chuan thuchhuah siamin, "A dinhmun a ṭha leh tawh, chutihrualin endikna hrang hrang kalpui a la ngaih avangin damdawi inah a la awm chhunzawm rih ang," a ti. Serie A dan leh hrai ang chuan match hi a tir aṭang ni loin, an khelh hmabak aṭangin an la chhunzawm leh ang.

Ivory Coast inter-national Ndicka hian 2023 khan Eintracht Frankfurt aṭangin Roma hi a zawm. Italian club tan hian match 19 a khel tawh a, tun hnaia an player pawimawh zinga mi a nih avangin vanduaina a tawk hi channa lian a ni dawn.

Pathianni zan Serie A inkhel dangah Inter Milan chu Cagliari nen 2-2 in an inhnehtawk. Inter hnaih bertu AC Milan pawh an chak zo bik lo, an mikhualna ramah Sassuolo nen 3-3 in an inhnehtawk ve bawk a ni.

April 22, Thawhṭanni zanah 'Milan Derby' a awm dawn - hmahruaitu Inter hi an chak a nih chuan an champion thei tawh dawn, tunah hian pahnihna Milan aiin point 14 ngawtin an sang fal mek a ni.