Texas mawitu Maverick Vinales

Grand Prix of the Americas MotoGP an tlan zo a, rider hmuhnawm thei tak Maverick Vinales chuan hnehna a chang - tun season rider championship hmahruai mektu Jorge Martin chu palinaah a thleng thung.

Jorge Martin, Texas-a intlansiakah kum 29 mi Vinales a che ṭha a, inelna tak neih hma a tlan 'sprint race' lamah pawh a chungnung. Intlansiak takah hian a bul erawh duhthusama ṭhain a ṭan thei bik lo.

Lap hmasa ber an tlan lai chuan 11-naah a thlahniam hman hial. Mahse, zawimuangin a tho chhuak a, a tawpah ropui taka hnehtu a ni, a hnungah hian Pedro Acosta leh Enea Bastianini te chuan dawhsan (podium) an lawn ve bawk.

Suzuki leh Yamaha bike pawh lo khalh tawh, tuna Aprilia bike khalhtu Vinales chuan, "Ka elpui dangte khan min nawr na em em a, chutiang karah chuan harsa takin ka chak. Aprilia bakah team dang pahnih tan he hmunah hian ka lo chak tawh, ka tana hmun hlu a ni," a ti.

Bike intlansiakna sang ber hi tun season atan vawi thum an tlan tawh - intlansiak palina atan April 28, Pathianni tlaiah Spanish Grand Prix an tlan leh ang.