Tlak hlau Sevilla an chak

Tun season-a a vawi hnih nan a zawnin Sevilla an chak a, Pathianni zan khan Las Palmas chu 2-0 a hnehin relegation zone an tlansan hla zel - table-ah 13-na an ni ta a, point kuain relegation zone an tlansan tawh.

Las Palmas centre back Saul Coco chu minute rukna lekah red card pek niin, hnawhchhuah a ni a, a tam zawka khel Sevilla-in inkhel thunun zuiin, Youssef En-Nesyri chuan minute 43-naah goal hmasa zawk a khung a, hun pek belhah Dodi Lukébakio chuan a khung ve leh bawk.

Copa del Rey nomawi chawitu Athletic Bilbao-in chak result nen an champion an lawm thei lo a, an mikhual Villarreal chu 1-1 in an inhnehtawkpui.

Bilbao hian minute 66-naa Oihan Sancet goal chu an chakpui mai dawn emaw an ti a, mahse, minute 46-naa Villarreal midfielder Santi Comesaña hnawhchhuah a ni chungin goal khat aia tam khung an harsat.

Villarreal hian hun pek belhah penalty hmu zuiin, Dani Parejo chuan si phurh sut nan a khung a, 1-1 in inkhel a tawp. Season thara Champions League khelh tum Bilbao hian palina Atletico Madrid chu point liin an thlau ta a, Diego Simeone naute chetsual an chan tel a ṭul tawh.

Table mawngphah luah Almeria-in March 17 khan Las Palmas chu 1-0 in an hneh a, an vawi khat chakna a ni. A hnuah Osasuna chu 3-0 in ngam lo mah se, Pathianni zan khan team ṭha Real Sociedad chu 2-2 in an chelh.

Almeria tan Adri Embarba chuan goal hnih a khung a, a hnuhnung zawk hi penalty a ni. Embarba goal khung karah Sociedad tan Sheraldo Becker leh Mikel Oyarzabal ten goal khat ve ve an khung a, minute 86-naa penalty leh red card chawitu Igor Zubeldia chetsual an tuar.