Alcaraz a inhnukdawk

Barcelona Open khelh turah champion lai Carlos Alcaraz a inlan thei dawn lo. World number 3 hian inlan ngei tumin theihtawp chhuah mah se a ban dinglam hliam vangin tennis a khel thei rih lo a ni.

Kum 20 mi Alcaraz-a hi kar hmasa khan Monte Carlo Masters aṭang pawhin a lo inhnukdawk tawh a, tunah chuan a zawna vawi hnih a champion tawhna hmunah pawh a inkhel thei dawn ta lo.

Barcelona Open buatsaihtute chuan thuchhuah siamin, "Monte Carlo a khelh theih loh ang bawk khan tunah hian Carlos hi a la inkhel thei lo - Pathianni pawh khan training nei ve tawh mah se a pangngaiin a la ti thei lo, dam leh thuai turin kan duhsak," an ti.

Clay court inelnaah hian Alcaraz inlan thei dawn lo mah se Rafael Nadal chuan inlan a tum thung. Nadal hi a inkhelh mumal lohna a rei tawh a, tun ṭumah hian a inkhelh thiamna hmuna inlan tur ni mah se a dinhmun tur sawi lawk thiam a harsa hle.

Tun season chhunga Grand Slam pahnihna atan May thla chawhnu lam hian French Open an khel dawn, clay court inelna zinga lian leh ngaihhlut ber khel turin Nadal hian Paris pan ngei a tum a, chumi tur chuan a inbuatsaih dawn a ni.