FC Goa-in Chennaiyin an sawp

Indian Super League-a an league match hnuhnung berah FC Goa chuan 4-1 in Chennaiyin an sawp a, Chennai club hian playoff an luh tawh tho avangin result hian awmzia nei tawh lo mah se, a mualpho thlak thung!

Chennaiyin hian Rahim Ali hmangin goal an khung hmasa zawk hial a, mahse, Goa hian first half chhungin Borja Herrera, Carlos Martinez leh Brandon Fernandes hmangin an chhanglet - second half-ah Carlos Martinez chuan khung belh lehin, 4-1 in hnehna an chang.

FC Goa tan Ayush Chhetri chuan inkhel bul a ṭan a, Dinthar tlangval hi he inkhela Mizoram player inlan awmchhun a ni. Goa-in hnehna an chan avangin table-ah pahnihna an ni a, nizana Mumbai City leh Mohun Bagan inkhel result a zirin an dinhmun a danglam leh thei thung - result kan hre hman lo.

Bagan-in point an hlawh hrim hrim chuan pathumnaah Goa an tla leh dawn - ISL-a pakhatna leh pahnihna hi semifinal khel turin an tling nghal ṭhin a, pathumna aṭanga paruknaten playoff knockout an khel ṭhin thung.