Man United an chak; Solskjaer a him rih

Manchester United-in Inrinni zanah Goodison Park an tlawh a, Everton 3-1 in an hneh.

Toffees-in Bernard hmangin goal an khung hmasa a, United-in Bruno Fernandes goal hnih leh substitute Edinson Cavani goal khat hmangin an chhang lêt.

Carlo Ancelotti hote hian Premier League-ah pakhatna dinhmun te luah hman mah se Merseyside derby-a Liverpool nen an inhnehtawk hnuah vawi thum an chak loh tak avangin point 13 hmuin paruknaah an awm.

United hi season bul ṭan chhe viauin lang mah se match khata an khelh tlemnaah hnehna an chan chuan Everton point hmuh zat an hmu thei dawn.

United thuneitu lamin Ole Gunnar Solskjaer-a dinhmun a him thu sawi mah se Everton an hneh loh chuan ban a nih tur thu a ri ring zawk. Goodison Park-ah inkhel hmuhnawm tak thlir tur awm lo mah se inkhel erawh a ṭang ṭha hle. 

Toffees-in James Rodriguez bakah defender pathum Lucas Digne, Mason Holgate leh Seamus Coleman te an chhawr leh thei tawh a, Man United forward Anthony Martial-a'n hremna a hmang zo ve bawk. Solskjaer-a'n Paul Pogba bench-ah dahin Juan Mata a chhawr.

Everton keeper Jordan Pickford-a ball pet chhuah chu boruakah Victor Lindelof leh Dominic Calvert-Lewin ten an inchuh a, Everton striker a chak - Calvert-Lewin-a thawhrah sengin Bernard-a'n minute 19-naah goal hmahruai a khung.

Minute 25-naah Luke Shaw-a cross chu Bruno Fernandes-a'n a tauh lut a, si phurh a sut. Portuguese midfielder hian minute 32-naah cross ve lehin Marcus Rashford-a'n tauh fuh chiah lo mah se keeper Pickford a tihbuai zarah Fernandes-a'n goal hnihna a khung.

Fernandes-a goal khung inkarah hian Lucas Digne-a'n goal ban a pet per a, Ancelotti hote hian si an phur hnuah pawh an nawr na viau bawk. Harry Maguire-a'n box chhungah Digne tlawh fuh mah se ball petu Calvert-Lewin a offside hman avangin penalty a pumpelh a, Toffees tan Abdoulaye Doucoure-a'n chance ṭha a hlah bawk.

Injury time-ah United-in counter attack hmangin an vaw let a, Bruno Fernandes-a'n hattrick siam theihna hun ṭha nei mah se a sira pawttu Edinson Cavani a pe zawk. Uruguayan striker hian United tana a goal hmasa ber a khung a, Solskjaer-a hote 3-1 in an chak.

United manager Ole Gunnar Solskjaer chuan, "United ka enkawl ṭan tirh aṭangin thlawpna ka hmu ṭha a, match hnih khat result ringawt kan thlir tur a ni lo. Ka enkawl ṭan tirh aṭang khan teh ula, khawi kawng nge kan zawh tih hi thlir a fuh zawk ang," tiin Old Trafford-ah a la cham chhunzawm tur thu a sawi.

Club thuneituten Norwegian manager hi an thlawp nia sawi a ni a, amaherawhchu result a pawimawh tel dawn. Everton lakah result an nei ṭha a, an khelh danah erawh point hloh thei reng an la ni thung.

United hian tun hnaiah ho lam taka goal chhuah an ngah a, Toffees nena an goal chhuah pawh hi chutiang zinga mi chu a ni. 

Harsatna belhchhah turin Marcus Rashford, Paul Pogba leh player langsarten hun pawimawhah mawhphurhna an la thei lo a, thutlukna an siam sual leh ṭhin. Tun dinhmunah chuan Solskjaer a him a, pressure erawh a la kiang vek lo thung.

Tun hnaia an chet chhiat chhanah Solskjaer-a'n fixtures a mawhpuh. United boss chuan, "Kan inkhelh hun hi kan chet chhiat chhan a ni. Match tam tak kan khelh hnuah Turkey-ah kan zin a, Ningani zingah kan rawn let leh a, Inrinniah match hmasa ber chaw-chhun (lunch) ei hun kan chang leh," tiin fixtures a hautak thu a sawi. Turkey leh England inkar hi thlawhtheihnain darkar nga thlawh a ngai a, United khingpui Everton erawh Europe-ah an inlan loh avangin hahdamna hun an nei thung.

Everton lakah hian damlohna avangin Mason Greenwood a inlan thei lo a, inkhelhnaah Luke Shaw, Marcus Rashford leh Victor Lindelof te an inhliam belh. United player thar Alex Telles chu Covid-19 vangin an chhawr thei lo a, tunah training a zawm leh tawh. Tunkar chho hian international match a awm dawn a, player inhliam tan damna hun ṭha a ni thei ang.