Mumbai tan Lianzuala goal a tawk zo lo

Tun season Indian Super League-a inkhel 'hot' bera chhal ngamah Lallianzuala Chhangte chuan minute 89-naah goal a khung a, a siamsaktu pawh Mizo midfielder Lalengmawia Ralte (Apuia) a ni.

Mahse, hun tawp hnaih lama Lianzuala goal khung hi Mumbai City chhanhim nan a tawk zo lo a, ISL league winner shield dawngtu chu Mohun Bagan Super Giant an ni - Thawhṭanni zan khan Bagan hian 2-1 in Mumbai City an hneh.

Mumbai City tan league winner ni turin point khat hlawhchhuah a tawk a, Bagan tan chak ngei a ngai thung. Mohun Bagan an chak avangin league winner shield an dawng a, cheng nuai 350 lawmman atan an dawng tel zui - season tharah AFC Champions League 2 an khel ang.

Mipui tam tak chu

"Khawia mi nge heng zozai?" tih mai tur khawpa tam mipui Salt Lake Stadium-ah an pungkhawm a, fans 60,000 chuang pungkhawmte hian Bagan flag, banner leh jersey an pho chhuak a, tawnhriat ngah player tan pawh zamna tham an ni.

Mumbai player-te pawh fans thawm bengchheng karah an inthlahrung deuh em ni chu aw, tih tur a ni a, minute 28-naah Dimitri Petratos ball pek ṭha tak chu Liston Colaco chuan mual vei lam aṭangin nalh zetin goal-ah a chantir - Salt Lake a chim dawn em ni? tih palh mai a awl!

Colaco hi a vannei lo zawk mah mah - goal a khung hma hian post a tihper a, chance ṭha dang vawi hnih vel a nei bawk a, anmahni khelmualah a tal na hle.

Lianzuala a hmuhnawm

Mumbai tan Lallianzuala Chhangte a hmuhnawm a, hero of the league ni lai forward hian ISL-a player ṭha ber ni awm rengin a khel - goal hmaah erawh a vannei tawk lo a, Lunglei tlangval 'zan' a ni dawn lo em ni chu aw, tih mai a awl.

First half-ah ringawt pawh Lza hian chance vawi thum vel a nei hman a, mahse, a hun ṭha neih a chhawr ṭangkai lo vek - chawlhlawk hman hma hreta a chance neih a tlawh goal lohte chu uiawm tak a ni.

Minute 80-naah Bagan bawkin goal an khung nawn a, Australian striker Petratos-a ball thlawh luh mawi lutuk chu Jason Cummings-a'n lo dawngin, season hmasa A League-a goal 20 khungtu striker hian goal-ah a chantir.

A tawk zo lo

Minute 89-na a ni a, Lza hun a inher chhuak ve ta nge nge - corner aṭanga ball kal chu Apuia'n Lianzuala tan a tauh thla a, Lunglei tlangval hian forward goal ni awm renga mawiin goal-ah a lo chantir.

Lianzuala'n a ban pharin, a ṭhiante fuih phur tum viau mah se, Mumbai tan hun a tlem lutuk hret tawh a, Bagan lakah an tlawm zui - Lza hian beisei angin season bul ṭan ṭha tawk lo mah se, league round match tawp ber khelh a nih meuh chuan a langsar leh tawh hle.

Lunglei tlangval hian league match 22 a khelhah goal sarih khung tawhin, assist vawi ruk a nei a, season hmasa khan goal 10 khungin, assist vawi ruk a nei thung.