Real manager tur Alonso?

Bundesliga-ah Xabi Alonso-a'n Bayer Leverkusen a champion pui a, Leverkusen-in an club history-a Bundesliga an chawi hmasak ber a ni. Leverkusen CEO Fernando Carro chuan engtik niah emaw chuan Alonso-a'n Real Madrid a la enkawl tur thu a sawi.

Carro chuan, "Rinhlehna pakhatmah ka nei lo. Xabi Alonso hi Real Madrid manager a la ni dawn. Thil chiang lo awmchhun chu engtik hunah nge Real Madrid tan contract a ziah ang tih hi a ni. Mahse, a thleng dawn. Min ring rawh u, ka thusawiah ka chiang," tiin a inringtawk hle.

Kum 42 mi Alonso hian Leverkusen a enkawl hma hian player a nih laia a club hmasa ber Real Sociedad B a enkawl a, Spanish coach hian a inkhelh hun laiin Liverpool, Real Madrid leh Bayern Munich tan sulhnu ṭha tak a nei. Jurgen Klopp-a'n Reds a chhuahsan dawn avangin English club nen hian sawizawm ni mah se Bayer Leverkusen-a a cham tur thu hi a tichiang a, season tharah chuan German club hi a la enkawl leh rih dawn.