Bayern Munich mualah Arsenal

Chak loh rilru na a la reh hman lo a, hliam na zawk dang tawrh belh thei dinhmunah Arsenal an ding mek - nat belh loha intuam dam an duh a nih chuan Bayern Munich an hneh a ngai dawn, kawng awlsam erawh a ni dawn lo.

Zanin dar 12:30 hian Gunners hian Bayern Munich nen Champions League quarterfinal second leg an khel dawn, an inkhelhna tur hmun hi Allianz Arena a ni a, an intawn hmasak boruak nen a danglam dawn tih chu thil chiang a ni.

Emirates Stadium-ah 2-2 in an inhnehtawk - North London khawpuia an inkhelh ṭum hian Bavarians lamin a hmunah ṭantu an nei lo. Tun ṭumah erawh mipui 75,024 lenna stadium-ah hian Bayern ṭantute an tam dawn - Mikel Arteta naute tan fiahna hautak tak a ni ngei ang.

Champions League-ah hian away goal rule hman a ni tawh lo, tunah hian team pahnih hi an dinhmun a la inang. Zaninah erawh inhnehtawk a awm thei dawn tawh lo, hun pangngaiah an inhnehtawk a nih chuan extra time an khel ang, chak zawk an la awm lo a nih cheu chuan penalty an pet ang.

Rice inringtawk

Arsenal hian Aston Villa an hneh loh avangin Premier League hmahruaitu an nihna an hloh a, chak loh avanga hrehawm an tih lai hian Declan Rice chuan a êng lam a thlir, zaninah pawh ṭha taka an khelh chhuah theih ngei a beisei thu a sawi.

England international midfielder Rice chuan, "Premier League lama kan chak lohna khan Bayern Munich lakah hian a ṭha zawngin nghawng kan neih tir tur a ni ang, chumi tur pawh chuan kan inpeih tawh bawk.

"Lungngaia indawm kun hun a ni lo, puan ven te sawi chhingin huaisen takin Allianz Arena kan lut tur a ni. Champions League semifinal lut tur remchang kan nei, round sang tak kan thlen theih chhan hi tun hi kan nihna tih lan hun tur a ni ang," tiin a sawi.

Rice hian season hmasa khan West Ham chu Europa Conference League nomawi a chawi pui a, nipui bazar lai khan Arsenal player man tam ber ni turin North London a pan. Arteta kaihhruaina hnuaiah hmun pawimawh a chang a, zaninah pawh mual laiah a mawhphurhna a sang hle ang.

Villa an hneh loh ṭumin Martin Odegaard chu hliam vanga thlak a ngai. Gunners captain hi a dinhmun a chiang lo, a inlan thei lo a nih chuan midfield siksawi hret a ngai dawn; Thomas Partey leh Jorginho an la awm avangin an inrem dik thei tura ngaih a ni.

Bavarians tlarhnung nawr tumin Kai Havertz chu tlarhma laiah a din leh a rinawm. Gabriel Jesus-a'n Villa lakah beisei a phak lo a, mual sir lamah Bukayo Saka awmin a lehlamah Gabriel Martinelli hmel kan hmuh a rinawm bawk, goal khung ngei a ngaih avangin inven ringawt a remchang dawn lo.

Rin kai Bayern

England international hlui, tuna football pundit ni ta Rio Ferdinand chuan, "Bayern Munich hi an dinhmun a ṭha zawkah ka ngai. Anmahni khemualah fans nen an khel tawh dawn a, chu bakah European football-ah tawnhriat an nei ṭha, Arsenal pawh chak thei an nih laiin Bayern ka ring zawk," a ti.

Ferdinand thusawi hi mi tam tak rin dan nen a inmil ngei ang. Bayern Munich hian UCL-ah tawnhriat an nei ṭha, a bik takin Arsenal hi an ngam ṭhin hle bawk. Kuminah hian Bundesliga title an lak phak loh avangin European football lama hlawhtlin an duhna hi a sang zual dawn tih a chiang bawk.

Chutihrualin, coach Thomas Tuchel tan buaina tur a awm ve tho. Kingsley Coman a hliam thar bakah Serge Gnabry-a chu a dinhmun a la chiang lo. Anni pahnih bakah hian Tuchel chuan a forward ṭha Leroy Sane chu a chiang lo tih a sawi bawk a, tlarhma lamah harsatna tawk thei an ni.

Striker Harry Kane erawh a dam ṭha. Tottenham tana a khelh lai aṭang tawhin Kane hian Gunners a ngam hle, zaninah pawh ani ven hi Gabriel leh William Saliba te tan hna hauak a ni leh ngei dawn, tun season inelna hrang hranga goal 39 khung tawh a nih avangin a hlauhawmzia inhrilh nawn a ngai lo.

Emirates Stadium-ah khan Tuchel-a'n tlarhma lai aiin a sir lam aṭangin a naute goal a nawr nasat tir, tlan chak Sane leh Gnabry te an hlauhawmin goal an khung theih chhan pawh an ni. Zaninah erawh a player neih dan a zirin Kane hnenah ball an pe hnem a nih pawhin a mak lo ang, mikhual tan a sir aiin a lai ven ngun a ngaih a rinawm.

Bundesliga leh German Cup an lak loh avangin Bayern Munich tan season dang zawng aiin UCL hlutna hi a zual dawn a, chuvangin coach Tuchel tan season an hman fuh lo tak thawi damna tur leh khuh mawi theih nan champion a pawimawh - zanin atan chuan mikhual lakah ṭhat chhuah an duh hauh lo ang.