City emaw Real emaw tlak zan!

Zanin hian UEFA Champions League champion lai Manchester City an tla lo a nih chuan champion ngun ber Real Madrid an tla dawn. UCL quarterfinal second leg-ah City leh Real te hi zanin dar 12:30 hian Etihad Stadium-ah an inhmachhawn ang.

Santiago Bernabeu-ah team ṭha pahnih hi 3-3 in an inhnehtawk a, goal aṭang teh chuan dinhmun ṭha zawk an awm lo. Chutihrualin Pep Guardiola kaihhruai City hi an muala an khel tur an nih avangin an dinhmun ṭha hretah a ngaih theih.

Season liam ta khan semifinal-ah an inhmachhawn a, Santiago Bernabeu-ah 1-1 in an inhnehtawk. Second leg hi Etihad Stadium-a khelh a ni a, City 4-0 ngawtin an chak. Tun ṭuma an inhnehtawk zawh hian Federico Valverde chuan, "Kan inhnehtawk chiah khan season liam ta min hriatchhuah tir a, chak lo ang mai kan ni. Phuba lak châkna thinlung nen Manchester kan zin a ṭul a, semifinal thlen châkna tak tak kan neih a ngai," tiin a sawi.

Mahse, UCL a nih tawh chuan vawi 14 champion tawh Real hi dahhniam theih a ni lo a, coach tawnhriat nei ṭha Carlo Ancelotti-a'n a ho bawk tih hriat a ṭha. First leg-ah Rodrygo a langsar a, Vinicius Jr erawh a siamtu lamah a ṭang. Second leg-ah erawh Brazilian winger tlan chak Vini Jr hi a chet ṭhat lehzual a ṭul dawn a, chutihrualin Kyle Walker-a'n a ven tawh dawn avangin City tlarhnung paltlang a harsa sawt ang.

City lam tan chanchin lawmawm hriat tur a tam zawk. Eder Militao-a'n bul a la ṭan theih a rinawm si lo a, Aurélien Tchouameni lah hrem a ni bawk. Real tlarhnung a nghet ṭha tawk lo a, a hmachhawn tur City striker Erling Haaland-a'n kartawp inkhelah goal a khung.

First leg-ah damlohna vangin Kevin de Bruyne-a inlan lo a, Etihad Stadium-ah erawh bul a ṭan theih a rinawm. Man City boss Pep Guardiola chuan, "Chak kan mamawh a, min ṭantute kan mamawh tel bawk. He inlelna 'lal' hneh tur hian kan theihna zawng zawng kan sawr chhuah a ṭul a ni. Min ṭantute puihna nen chak ngei kan tum dawn a, mahse Madrid hian kan lamah goal khat tal an khung ang," tiin a sawi a, chak a inbeisei avangin Ancelotti leh a hote lamah goal khat aia tam khung a inringah a ngaih theih.

Santiago Bernabeu-ah City-in 62% ball possession an nei thei a, pass 689 neiin Real aiin vawi 266 ngawtin an in pass tam zawk. Heti chung hian City hian Real khelmual grass chu a mam tawk lo niin an sawi. Etihad Stadium-ah an khel dawn a, City-in ball an chang tam dawn tih hriat lawk theih mah se chak tur erawh a chiang lo.