Everton sawisatu Cole Palmer
Chelsea hun thim chhi eng turin mi pakhat a lo kal a, a hming chu 'Cole Palmer' a ni, a team chet chhiat lai tak pawhin English forward hian beiseina meichher chu hma lam panin a chhi hram hram a ni.
Palmer-a goal li bakah Nicolas Jackson leh substitute Alfie Gilchrist te goal khat ve ve hmangin Chelsea chuan Everton 6-0 in an sawp a, point an paihsak vanga talbuai Toffees buaina an belhchhahsak.
Minute 13-na lekah Palmer hian Everton defender Jarrad Branthwaite kapkarah thunsakin, chumi hnuah Jackson nen an in one-two hnuin goal mawi a khung. Jackson-a shot Everton keeper Jordan Pickford danper chu hnaite aṭangin a tauh lut zui bawk a ni.
England international hian a duhtawk mai lo - Pickford-a ball pet chhuah lo chang fuhin goal lamah a pet nghal a, keeper hi a let hman tawh lo. Minute 29 an khelh chuan hattrick a siam fel der tawh.
Chawlhlawk hmain Jackson-a goal kan hmuh bakah second half-ah goal hnih dang a lut bawk, penalty an hlawh chhuah pet tur erawh an buai deuh lai a, inkhelh banah coach Mauricio Pochettino chuan an penalty pettu chu Palmer a nih thu a sawi zui.
Blues hian second half-ah penalty an hlawh chhuak, pet beiseitu Noni Madueke chuan Malo Gusto hnen aṭangin ball a la a, striker Jackson chuan pet a tum bawk, senior player Thiago Silva a inrawlh a ngai a, captain armband hrengtu Conor Gallagher chuan penalty chu Palmer pet turin a ti.
Penalty inchuh chungchang sawiin Blues manager Pochettino chuan, "Hetiang thil thleng hi ka pawm thei lo, chiang taka ka hrilh duh chu hetiang thil thleng hi a tawpna leh a hnuhnung ber pawh ni nghal bawk rawh se.
"Ṭha takin kan khel a, hetiang taka ṭhaa kan khel chunga khatiang thil a thleng kha a mawi lo takzet. Team ropui tak din kan duh a nih chuan hetiang rilru puthmang hi chu kan thlak tur a ni," a ti.
Thutlukna an siam fel thu sawi zuiin Poch chuan, "Penalty pettu tur chu Cole Palmer a ni. Palmer khan midang a pet tir duh a nih chuan thutlukna a siam zawk tur a ni, player naupang zawkte an ni a, thil thleng kha a zahthlakin thawhhona ṭha zawk nei turin kan inzir tur a ni ang," a ti a, forward ṭha Palmer a chhan na hle.