Wilder leh Hearn an thawk dun - Zhang a hmachhawn dawn
American boxer rothap Deontay Wilder chu rin loh takin Matchroom Boxing nen an thawk dun dawn a, rei tak chhung buaina a lo neihpui tawh Eddie Hearn nen an thawk dun dawn tihna a ni - khawvel mak tih a hlawh.
Matchroom Sport chairman Eddie Hearn hi Anthony Joshua promoter a ni a, hei vang hian Wilder leh Joshua inhnek tir tuma an hmalakna chungchangah Wilder a lungawi lo tawh ṭhin a, na tak takin an inbei fo.
Mahse, tun hnaiah erawh an inhriatthiam lohna dah ṭhain, Wilder leh boxing khawvela thil tithei ber pawl Eddie Hearn te an inrem a, boxing ngainatute an barakhaih chiang hle.
A chhan chu
June 1 khian Saudi Arabia-ah boxing hmuhnawm tak chhawp chhuak turin Matchroom Boxing leh Queensberry Promotions te chuan hma an la a, boxing khawvela boxer nei langsar pahnih hian a ṭha thei ang ber boxer chhawpchhuah an duh.
Hei vang hian Matchroom Boxing chuan Deontay Wilder hi an la lut a, American boxer chuan, "Eddie leh kei hi kan thawh dun theih mi tam takin an ring lo a, an tan chuan hei chu thil mak tak a ni.
"Mahse, zan khat atan chauh kan thawk dun dawn," tiin a sawi a, June 1-ah hian Chinese boxer lar Zhilei Zhang a hmachhawn dawn - inhnek hmuhnawm tak an chhawpchhuah beisei a ni.
Wilder a chuai
Khawvela boxer rothap ber pawl Wilder thawm a ring ṭhin a, mahse, American boxer hi Tyson Fury a tawn hnuah ngai a awh thei meuh lo. December 1, 2018 khan Fury nen hian a vawi khat nan an intawng a, an inhnehtawk.
Fury a hmachhawn hnuah Wilder hi vawi hnih a chak a, mahse, February, 2020 leh October 2021 khan Fury hi a hmachhawn nawn a, technical knockout leh knockout hmangin a tlawm zawkah a ṭang ve ve.
American boxer hnek na zet hian round khatna leka Robert Helenius hnehin, insiamṭha lehah inngai mah se, December 2023 khan Joesph Parker a ngam lo zui a, June-ah a lo kir leh dawn ta.
Theihna zawng zawng
Kum 38 mi Wilder chuan, "Theihna ka la nei reng em, tih chu tunah kan hre dawn. Ka fight tawp ber tur ang maiin ka bei dawn a ni," a ti a, Zhang lakah hnehna chan ngei a tum.
Wilder chuan sawi zawmin, "Boxing khawvel ka hmangaihna leh he infiamnaa ka tuihalna chu ka hloh tawh a, chhan hrang hrang avangin boxing ka ngainatna hi a hniam tawh hle. Hloh leh tur chuan ka nei tawh lo a, rothap takin ka bei dawn a ni," a ti.
June-a inhnek turah hian Wilder leh Zhang chiah an inhmachhawn dawn lo. Fight dang pali inhnek tur hmuhnawm tak tak a awm dawn bawk.
Tu nge Zhang?
Wilder-a hmachhawn tur Zhilei Zhang hi kum 40 mi a ni tawh a, kum 2008 Olympic-ah khan super-heavyweight-ah silver medal a la tawh a, kum 2010 Asian Games-ah khan gold a la bawk.
Zhang hian professional boxing a luhchilh hnuah vawi 29 fight hmachhawn tawhin, vawi 26 a chak a, vawi hnih a tlawm a, vawi khat draw a nei.
March 8, 2024 khan a fight hnuhnung ber hmachhawnin, Joseph Parker nen an inhnek a, mahse, Wilder pawhin a lo ngam loh tawh boxer hi ngam bik loin, WBO interim heavyweight title a hloh.