Number 80-ah Nagal a awm

Mipa tennis thuneitu sang Association of Tennis Professionals (ATP) ranking tharah Sumit Nagal chu world number 80 a ni a, tun dinhmunah chuan Indian singles player zinga tawng sang ber a ni.

Monte Carlo Masters khelh zawh takah khan Nagal hian Flavio Cobolli leh Facundo Diaz te hnehin main draw a invaw kai a, Vijay Amritraj (1977) leh Ramesh Krishnan (1982) te hnung zuiin Indian player zingah clay court bika Masters main draw khel thei hmasa a ni hial.

Main draw chinah pawh thil mak a thlen tir, a match hmasa berah world number 38 Matteo Arnaldi a hneh. Kum 1990 aṭangin Masters Tournament kalpui a ni, a hnu lamah Indian player zingah clay-a chak hmasa ber a ni bawk.

World number 80 ni turin Nagal hian a hma lama player awm 13 ngawt a kal kan, Indian player dang Ramkumar Ramanathan chu world number 358 a ni a, anni pahnih hnaih leh deuhtu chu Mukund Sasikumar (450) a ni thung.

Indian player zingah Rohan Bopanna chu doubles huangah number 2 a ni, a hmain number 1 ni mah se Bopanna leh a ṭanpui Matthew Ebden te hi seeded pakhatna ni chungin Monte Carlo-ah khan hneh nei loin an tla, an ranking a nghawng zui ta a ni.

Mipa singles ranking chung berah hian Novak Djokovic a la awm chhunzawm. Serbian star hi kum 36 mi a ni tawh a, tun hnai khan Roger Federer khumin world number 1 ni thei upa ber a ni, a record hi a chhawmnung zel.

Djokovic hnungah hian Australian Open 2024 champion Jannik Sinner awmin, hliam vanga Barcelona Open khel thei lo tur Carlos Alcaraz chuan pathumna dinhmun a la luah ve bawk.