Beiseina nei thartu Valencia

Season chawhma lama tlak hlau Valencia-in beiseina an nei thar ve leh ta a, tunah chuan season thara European football khel thei dinhmunah an ding mek tawh - Thawhṭanni zan khan khualmualah Osasuna chu 1-0 in an hneh a, table-ah pasarihnaah an invawrh chho.

Valencia tan Andre Almeida chuan minute 18-na lekah goal hmahruai a khung a, goal dang a luh zui loh avangin mikhual team chak nan a tawk. Valencia hian hnehna an chan avangin table-ah pasarihnaah an chho a, La Liga table-a pasarihna chin hian Europa Conference League playoff round an khel dawn.

Ruben Baraja enkawl team hian Europa League an khel lo ang tih pawh a sawi theih loh. La Liga-a pangana leh parukna ten Europa League an khel ṭhin a, Valencia hian match sarih khelh tur la awmah parukna Real Sociedad chu point thum chauhin an phak lo mek - team pahnih hi an la intawng leh dawn a, Valencia tan chance a ṭha hle.