Nuam ti taka inkhelh duh Nadal

Tennis inelna Barcelona Open-ah Rafael Nadal a inlan ve leh ngei dawn a, hun rei tak hnua inkhel ve leh tur chauh a nih avangin khawvelin a ngaihven, hetih lai hian Nadal chuan nuam ti taka inkhelh a duh thu a sawi.

Kum khat deuh thaw chu hliam vangin Nadal hi a chawl a, chumi hnuah kumin January thla khan Brisbane International-ah a lo kir, mahse hliam a neih zui leh avangin a hnu lamah a la inkhel leh lo.

Kum 37 mi Nadal chuan, "Ka hliam chanchin leh awmdan hi tun ṭumah chuan ka sawi thei lo, a chhan chu a thuiin sawi tur hi a tam lutuk vang a ni. Ka sawi theih erawh chu tunah chuan ka dinhmun a ṭha chho ve leh ta.

"Tennis khel turin court chhunga luh ka inpeih a, chu chu a pawimawh lai tak chu a ni. Eng ang takin nge ka khelh theih ang tih pawh ka la sawi lawk ngam lo, nuam ti tak maia inkhelh phawt mai ka duh," a ti.

Nadal hian tennis khawvelah chuan a hun hnuhnung lam a hmang mek a, tun ṭuma an khelh Barcelona Open hi vawi 12 a champion tawhna hmun a ni, hun rei tak hnua lo kir ni mah se a mikhual hran lo ang.

Nadal inkhelh thiamna clay court season hman mek a ni - May thla chawhnu lam aṭanga June thlatir hian vawi 14 a champion tawhna French Open khelh a ni dawn bawk, Paris khawpuiah Nadal hi inkhel thei ngei se tih chu tennis ngainatute duhthusam a ni.