Atalanta an chelh

Liverpool an hneh vangin Atalanta boruak a nung a, mahse Europa League lama an result ṭha tak hi Serie A-ah an chhawm thei rih lo. Thawhṭanni zan inkhelah Hellas Verona nen 2-2 in an inhnehtawk.

Atalanta hian ni dang ang bawkin goal an nawr na, chawlhlawk hmain Gianluca Scamacca leh Ederson te hmangin goal an khung nghal a, mahse second half-ah an hum thei lo thung.

Mikhual Verona lamin Darko Lazovic leh Tijjan Noslin te hmangin an sut a, table mawngphah lama talbuai lai Verona tan point khat hlu tak a ni ngei ang - Atalanta tan erawh a sang pali zinga tel phak beiseina a tlem sawt.

Gian Piero Gasperini-a naute hian Ningani zanah Europa League quarterfinal second leg khel turin Reds an mikhual zui dawn. Anfield-ah 3-0 in an chak tawh a, semifinal lut tur chuan mahni goal venhim ṭhat a tawk ang.