Sunrisers Hyderabad-in RCB an hneh

Thawhṭanni zan Indian Premier League inkhelah Sunrisers Hyderabad chuan run 25-in Royal Challengers Bengaluru an hneh a, table-ah a sang pali zingah an tel - an hneh tak RCB erawh table mawngphah an luah mek a, an tan khua a var thei lo.

Ṭhumvawrah RCB vannei zawkin, vawm hmasak an thlang a, duh an thlang sual. Hyderabad hian over 20-ah run 287 ngawt siamin, wicket thum chiah an hloh a, Australian batsman Travis Head chuan run 102 ngawt a siam a, run 67 siamtu Heinrich Klaasen-a'n a thawhhlawk viau bawk.

RCB lamin Virat Kohli hoin theihtawp an chhuah a, run siam ṭha thawkhat mah se, an target um a sang lutuk hret a, an chak zo ta lo. RCB tan Kohli-a'n run 42 siamin, a dinpui captain Faf du Plessis chuan run 62 a thawh bawk.

Run 10 pawh siam tling loa batsman dang an out nual hnuah Dinesh Karthik inlar ve lehin, ani pawh hian run 83 a vaw chhuak ve leh a, mahse, an team erawh a chakpui zo bik ta chuang lo a ni.

Nizan khan Kolkata Knight Riders khelmualah Rajasthan Royals leng lutin, an result kan hre hman lo a, zanin dar 7:30-ah Gujarat Titans chuan Delhi Capitals an mikhual ang.