A chung berah Djokovic awm tlang

Novak Djokovic chuan world number 1 ni chungin season a khar dawn tih a chiang ta, a chung bera awm chungin ṭum ruk ngawt kum tawp a hmanna tur a ni a, record nei ṭha ber Pete Sampras a nih rual chiah.

Serbian tlangval hi tun kara khelh Paris Masters lamah inlan lo mah se a ranking point hmuhsa a sang fal a, pahnihna Rafael Nadal chuan umphak theihna hun a neih Sofia Open khelh a tum loh thu a tichiang a, number 1 Djokovic dinhmun a chian phah nghal.

Kum 33 mi Djokovic chuan, "Ka naupan lai chuan Pete inkhel ka en nasa, a tih dan zir chungin ka hun hmasa lam kha chu ka hmang, tunah a record neih lai nih rual mai hi chu duhthusam a thleng dik ta a ni.

"Player ṭha zual zawk nih ka la rum reng dawn tho a, infiamna ka hmangaih leh ngainat em emah hian sulhnu pawimawh leh ropui dang pawh hnutchhiah zel ka la tum," tiin beisei a neih san thu a sawi.

Number 1 ni chunga chawlh kar hman rei lamah erawh Roger Federer (310 weeks) chu a chungnung ber a la ni a, a hnuai chiahah hian kar 293 awm thei Novak a awm mek - a chesual viau a nih ngawt loh chuan Federer record pawh hi a umphak thei dawn niin a lang.

Mipa tennis thuneitu sang Association of Tennis Professionals chairman Andrea Gaudenzi chuan, "Tennis huangah chuan number 1 ni chunga season khar theih hi a hluin a ropui hle, kum tluanin an khel ṭha ber tihna a ni.

"Pete record kha ropui tak a ni a, tunah player ṭha dang Novak chuan a rawn nih rual ta. An sulhnu hi chhuanawm tak a ni," tiin Grand Slam vawi 17 champion tawh Djokovic a fak uar hle.

Djokovic hian kumin bikah chuan Australian Open nomawi a chawi, US Open aṭangin hnawl niin French Open final-ah Nadal a ngam lo. Tun hnai kum 10 chhung chu number 1 ni chungin vawi ruk ngawt kum tawp a hmang ta a, record a nei ṭha hle.