Der Klassiker-ah Bayern an chak

Bayern Munich-in Inrinni zan khan Der Klassiker-ah Borussia Dortmund 3-2 a hnehin Bundesliga-ah hmahruaitu an ni chhunzawm. Dortmund-in Marco Reus hmangin khung hmasa mah se Bavarians-in first half-ah vek David Alaba hmangin an chhanglet. 

Second half-ah Bayern tan Robert Lewandowski leh Leroy Sane ten an khung belh a, amaherawhchu mualneitu lamin Erling Braut Haaland hmanga siphurh an sut ṭhen avangin a tawp thlengin a hmuhnawm.

Hansi Flick-a hote hi an match hmasa pasarihah vawi ruk an chak a, Bundesliga-ah point 18 hmuin hmahruaitu an ni. Bavarians hi Lewandowski hoa an che ṭhat chhunzawm avangin season la ṭan chauh mah se champion nomawi humhim tura ngaih an ni leh tawh a; an hnuaia awm RB Leipzig (16 pts) leh Dortmund (15 pts) ten ṭum dang ang bawkin an elpha leh dawn lo niin a lang.

Captain Marco Reus-a'n minute 45-naah Raphael Guerreiro pass chu Dortmund hmahruaina ni turin ṭha zetin a khung. Lucien Favre hoten hian hmahruai chungin halftime an thleng thei lo a, David Alaba-a'n injury time-ah freekick aṭangin a chhanglet. 

Polish striker Lewandowski-a'n first half-ah goal khung mah se VAR hmangin pawm a ni lo. Second half-ah erawh Lewy hi dan theih a ni lo a, minute 48-naah Lucas Hernandez cross a tauh lut. Bavarians an khel ṭha a, Kingsley Coman-a'n goal ban a pet per zui bawk.

Minute 80-naah substitute Leroy Sane-a'n German Clasico a khelh hmasak berah goal a khung a, Lewy siamsak a ni.

Minute thum hnuah Haaland-a'n offside trap bumin Dortmund goal hnihna a khung a, hun tawp lam boruak nun phah mah se goal dang a luh belh tawh lo.

Lewandowski hian tun season match 10 a khelh tawh aṭangin goal 12 a khung a, assist vawi li a nei tawh. Polish striker a dam ṭhat phawt chuan awlsam takin Bundesliga an chawi leh turah a ngaih theih.

Amaherawhchu Bavarians hi Lewy ringawt a ni lo a, team angin an che ṭha ṭhin. An player pawimawh pakhat chu Joshua Kimmich a ni a, minute 36-naah inhliam avangin lakchhuah a ni.

Flick-a'n nipui transfer-ah Thiago Alcantara a chhuahtir tawh a, Bayern tan Kimmich-a inhliam hi channa nasa tak a ni. Chutihrualin Bavarians ang thoin Germany pawhin pawi an ti ngei ang.

Dortmund-in inkhel pawimawhah hnehna an chang zo lo a, Manchester United nena nipui transfer-a sawi zawm Jadon Sancho-a'n beisei a pha lo. English winger Sancho hian inkhel boruak sangah sulhnu a nei ṭha tawk lo a, minute 69-naah an la chhuak. Hetiang renga a kal chuan Dortmund hian an hralh tumna euro maktaduai 120 a chhuahtir an harsat ngei ang.