Enrique kaihhruai PSG-in Barca mual an luh chhuah

Champions League-ah comeback ropui a thleng tawh ṭhin a, April 16, Thawhlehni zana 'comeback' pawh hi UCL history-ah hmun pawimawh a chang pha ang. Luis Enrique chuan PSG enkawlin a club hlui Barcelona chu Paris-ah 3-2 in hneh lo mah se Catalan club mual Lluís Companys Olympic Stadium-ah 4-1 in an hneh.

Season hnih chhung last 16 paltlang tawh loin PSG-in semifinal an lut a, Atletico Madrid hnehtu Borussia Dortmund nen final khel tur an zawng ang. Catalan club-in an mualah Raphinha hmangin an khung hmasa a, amaherawhchu defender pawimawh Ronald Araujo hnawhchhuah hnuah inkhelah danglamna a thleng.

PSG tan Ousmane Dembele leh Vitinha ten goal khat ve ve hmangin an chhanglet a, aggregate-ah 4-4 a ni chiah. Hun pawimawh player danglam bik Kylian Mbappe a rawn inlar a, French forward hian goal hnih khungin PSG a chakpui.

Xavi a chesual?

Barca-in nung takin inkhel bul an ṭan a, Parc des Princes-a player hmuhnawm Raphinha bawk a hmuhnawm nawn. Mual dinglamah lamah Lamine Yamal-a'n a theihna sang tak a lantir a, Nuno Mendes-a'n dah ngaihna a hre lo. Yamal-a cross ball ṭha chu minute 12-naah Raphinha-a'n a khung a, aggregate-ah 4-2 in Barca-in hma an hruai chiah bawk.

Catalan club an hmuhnawm zel a, Robert Lewandowski-a'n box chhung aṭangin kawh zetin a pet over. Theihna nei sang Polish striker Lewy tan chuan goal-ah chantir theih awm tak a ni.

PSG lamin Mbappe hmangin Barca a rum ṭhaih ve tho a, Mbappe goal khung tur chu Andre Ter Stegen-a'n ṭha zetin a dang. Mual vei lam aṭang bawkin PSG-in Barca an nawr a, kum 21 mi Bradley Barcola ball lalut chu box pawn chiahah Ronald Araujo-a'n a tlawh thlu. Goal khung theihna a nih miau avangin referee-in Araujo hi a hnawt chhuak.

Araujo-a'n thutlukna a siam sual avangin Barca-in player 10-in an khelh phah. Xavi-a'n defender lai a luhtir a ṭul a, Inigo Martinez luhtirin a thlak chu Yamal a ni. Barca hian goal venhim an mamawh a, chutihrualin an attack-an ber Yamal an thlak avangin PSG-in an attack nat lehzual phahah a ngaih theih!

Comeback chu...

PSG-in an nawr na chhunzawm a, mual vei lam aṭanga nawr zelin minute 40-naah Barcola cross chu Dembele-a'n chiang zetin a pet lut.

Second half-ah pawh PSG-in nawr na chhunzawm a, Fabian Ruiz-a'n chance ṭha hmasa a hlah. French club an phur zel a, Vitinha-a'n box pawn aṭangin minute 54-naah a khung. Goal luh hnu lawkah referee thutlukna sawiseltu Xavi chu hnawhchhuah a ni leh bawk.

Manager Xavi tel loin Barca an buai leh zual a, Joao Cancelo chuan ṭul lo zetin box chhungah Dembele a tlawh thlu a, referee-in penalty a pe. Mbappe-a'n penalty hi goal-ah a chantir a, minute 61-na a nih meuh chuan aggregate-ah PSG-in 5-4 in hma an hruai ta zawk.

Barca-in player 10-a khel chungin 'risk' lain an nawr a, goal mamawh hunah Lewy-a'n goal a khung thei lo. Mbappe erawh goal hmaah a vannei thung. Minute 89-naah counter attack hmangin PSG-in an vaw let a, Mbappe-a'n khung nghal lo mah se ball hi French forward hi a zawng emaw tih mai tur a ni. Ball per chu Mbappe zawnah a kal leh a, PSG no. 7 hian a pet goal chiang hle.

Mbappe-a'n goal hnih a khung avangin a langsar a, chutihrualin Marquinhos leh Vitinha te hming lam hmaih a thiang lo. PSG-in Barca lakah team ṭha an ni tih an lantir a, champion hial an beisei ngam ang.