Signal Iduna Park-ah Dortmund an lam

Borussia Dortmund-in khualmualah Atletico Madrid 2-1 in hneh lo mah se an mual Signal Iduna Park-ah 4-2 in an lehthal a, UCL semifinal an lut. German club tan an mual Signal Iduna Park hi kulhpui a ni a, UCL match hnuhnung 18 an khelhah vawi khat chiah chak loh an nei a ni.

Thawhlehni zan inkhelah hian Dortmund tan Julian Brandt, Ian Maatsen, Niclas Fullkrug leh Marcel Sabitzer ten goal khat ṭheuh an khung. Dortmund defender Mats Hummels-a'n an lamah a tih goal bakah Atletico forward Angel Correa-a'n goal a khung bawk avangin hun tawp hamrik hma chu chak tur zawk a chiang lo. German club hi aggregate-ah 5-4 in an vannei.

First half-ah Dortmund

Ṭan phat aṭangin inkhel a nung a, Yellow wall-te thawm a ring. Atletico zawkin chance ṭha an nei hmasa a, Alvaro Morata-a'n keeper chauh a hmachhawn hnuah a khung lo.

Dortmund erawhin hun ṭha an bawhpelh lo a, Julian Brandt-a'n minute 34-naah angle zim tak aṭangin kawh zetin a pet goal. Minute nga hnuah Dortmund-in mawi zetin Atletico tlarhnung an ṭhiat a, Ian Maatsen-a'n a khung. First half-ah 2-0 in Dortmund-in hma na hruai a, aggregate-ah 3-2 in an hma an hruai ta bawk.

Atletico an tho chhuak

Diego Simeone-ah halftime-ah a naute a fuih ṭha a, second half-ah bul an ṭan ṭha zawk. Minute 49-naah corner kick aṭanga ball kal chu Hummels-a'n an lamah tilut.

Agg-ah 3-3 a ni leh chiah a, Atletico an phur. Spanish club-in an nawr nat rah an seng a, Angel Correa-a'n a chance neih hmasak khung lo mah se a per chu goal-ah pet lehin minute 64-naah goal pawimawh a khung. Atletico dinhmun a ṭha leh ta zawk.

Dortmund an comeback

Dortmund hian Germany-in FIFA World Cup-a no. 9 atana an hman Niclas Füllkrug chu nipui bazarah an lalut a, kum upat hnua lar Fullkrug hi Bundesliga-ah chuan goal khung theih vangin a lar. UCL-ah pawh Fullkrug a duai lo, minute 71-naah Marcel Sabitzer-a cross chu mawi zetin a tauh lut.

Bayern Munich leh Manchester United duh loh Sabitzer-a'n theihna a nei sang tih a lantir chhunzawm a, minute 74-naah box chhungah petna tur khawp insiamin goal ṭha zet a khung.

Dortmund an ṭang tluan a, aggregate-ah 5-4 in an chak a, semifinal an thleng. German coach Edin Terzic chuan, "Ka hlim tak zet a ni. Boruak a nuam em em a, thil thleng pahnih vangin chak lo thei dinhmunah kan ding. Mahse, kan tho chhuak leh a, team ṭha tak Atletico kan hneh thei hi ka inchhuang a ni," tiin a sawi.