Chelsea-in hma an sawn zelChelsea-in hma an sawn zel

Frank Lampard-a enkawl Chelsea khelh danah hmasawnna hmuh tur a awm chho zel a, Inrinni zan khan Stamford Bridge-ah Sheffield United 4-1 in an sawp.

Blades hian David McGoldrick hmangin goal khung hmasa mah se Chelsea tiphurtu chauh a ni a, Blues-in Tammy Abraham, Ben Chilwell, Thiago Silva leh Timo Werner te hmangin an chhanglet.

Chelsea-in Southampton laka goal thum an hmachhawn hnuah Sevilla, Manchester United, Krasnodar, Burnley leh Rennes te khelhpui leh tawhin goal an chhuah lo.

Sheffield United lakah erawh minute kuana lekah goal an chhuah a, chutihrualin David McGoldrick-a goal khung danah Chelsea tlarhnung dem theih an ni lo. Blades passing a mawi a, an vanneih tel bawk avangin Thiago Silva leh Edouard Mendy te telna Blues-in goal an chhuah.

September leh October thlaa goal khung thei Chelsea leh November thlaa goal khung nuam ti Chelsea hi an danglam leh tawh, nasa takin hma an sawn. 

November thla a thlen meuh chuan player thar Hakim Ziyech ball pet thiamzia hmuh turin a awm. Ajax aṭanga London club zawmtu hian a duhna takah ball a dah ni berin a lang a, Blues goal nawr a nat phah hle. Leicester City aṭanga an lakluh Ben Chilwell pawh mual sir aṭangin a hlauhawm a, Timo Werner pawh a hma aiin a hriam tawh bawk.

Tammy Abraham-a'n khelhna hun ṭha a neih chu goal khung nan a hmang a, minute 23-na lekah siphurh an sut nghal. Chilwell-a'n minute 34-naah Ziyech aṭanga a ball hmuh chu hmahruai nan a khung a, Silva-a'n minute 77-naah Ziyech-a corner pet a tauh lut bawk. 

Thiago Silva hi kum 36 mi a ni a; Zlatan Ibrahimovic leh Cristiano Ronaldo te ang thoin Brazilian defender hian upat hnuah ṭha takin a khelh theih tih a nemnghet. Timo Werner-a'n keeper chiah a hmachhawn hnuah a ti goal lo a, chance vawi hnihna erawh a hlah lo. German forward hian Chelsea tan inelna hrang hrangah goal riat a khung der tawh a, Premier League-ah ringawt pawh goal li a khung. 

Chelsea manager Lampard chuan, "Kan khelh danah kan lungawi hle. Sheffield United hi khelh an harsa a, coach ṭha tak an nei bawk. Chutiang team lakah chuan chance ṭhahnem tak kan nei a, goal li kan khung. Lawmna tur tam tak ka nei a, chutihrualin kan tih tur erawh kan tih tur chhhunzawm a ṭul," tiin inkhelh banah a sawi.

Blues hian Covid-19 positive vangin Kai Havertz an chhawr thei lo a, player pawimawh dang Christian Pulisic a inhliam mek bawk. Heti chung hian Chelsea-in attacking football ṭha tak an khel thei a, season ṭantirha Lampard-a'n a sawi tawh angin champion an tum ngei tih an khelh dan hmangin an lantir.