Vau zam theih loh Dembele

Kum 2019 khan PSG-in Barcelona duh lai Neymar chu Barcelona-in €222m-in an lei chhuak a, Catalan club-in Brazilian forward thlak nan hian Ousmane Dembele (€105m+€40m) leh Philippe Coutinho (€120m+€40m) te Borussia Dortmund leh Liverpool aṭangin an lalut.

Catalan club hian euro maktaduai 300 chuang Dembele leh Coutinho manah seng mah se talent nei ṭha pahnih hian Nou Camp-ah an theihna ang takin an khel chhuak lo. Coutinho hian Bayern Munich a zawm hnuah UCL-a Barca an sawp ṭumin goal a khung.

Dembele pawhin UCL quarterfinal first leg-ah Barca lakah goal a khung a, a lawm nasa bawk nen Catalan ṭantute an au el nasa a, banner hmuh nuam lo tak tak an pho chhuak bawk.

French winger Dembele a zam phah lo a, second leg-ah pawh player langsar niin goal a khung bakah man of the match-ah thlan a ni hial. Inkhelh banah Dembele chuan, "Barcelona hi club ropui tak a ni. Paris-ah ka hlim a, tunah chuan semifinal kan khel dawn. Barca ṭantute min auh elna ka hrethiam. Football stadium-ah chuan hetiang hi a thleng ṭhin," tiin a sawi.

Dembele hian tun season-ah goal thum chauh a la khung a, goal hnih hi a club hlui Barcelona lama a khung a ni.