Liverpool an tho thei dawn em?

Nomawi pali nena season khar beiseitu Liverpool chu nomawi pakhat bak chawi lo thei dinhmunah an ding mek - tun thlatira Premier League hmahruaitu hi table-ah pathumna an ni a, FA Cup aṭangin an tla tawh a, Europa League quarterfinal aṭangin tla thei dinhmunah an ding mek.

Reds hian quarterfinal first leg-ah Atalanta an mikhual a, rin loh takin Italian club lakah hian 3-0 ngawtin an tlawm - 'comeback' turin goal li tal an khung a ngai dawn tihna a ni a, Jurgen Klopp leh a naute tan thawh leh a harsa dawn.

Mahse, Liverpool erawh an beidawng ve lo. Coach Jurgen Klopp chuan, "Kan hneh let thei ang em, tia min zawt a nih chuan, 'Aw' tiin ka chhang ang che," tiin Atalanta chungchang a lo sawi tawh a, comeback ropui lantir a tum.

Dutch defender Virgil van Dijk chuan, "Kan chak theih kan inring lo a nih chuan Italy-a kal awmzia a awm lo," a ti a, Italian club lakah a team chu hnehna chanpui a tum ruh hle.

Kar duhawm lo

Tun hnaia thil thlen dan thlirin, Liverpool fans tan chuan khawsikna tham a ni! April 7 khan Manchester United chu khualmualah 2-2 in an inhnehtawkpui a, Old Trafford-a result duhawm lo an neih hnuah an tho leh tawh lo.

Kar hmasa khan Atalanta chu 3-0 ngawtin an ngam lo zui. Premier League nomawi inchuh boruak san vanglai takin, Pathianni zan khan Crystal Palace an hmachhawn zui ve leh a, an inkhelh hmain Klopp-a'n, "Atalanta laka kan chak loh kha kan siam ṭha ang, ka tiam a che u," a ti.

Mahse, a sawi leh a tak ram a inhlat a, Anfield-ah Palace hi 1-0 in an ngam lo a, Premier League nomawi an thlauh ti pawhin a sawi theih - kum 2021 hnua a zawna Anfield-a an tlawm hmasak ber a ni.

League Cup champion Liverpool hi a zawnin match thum an chak zo tawh lo tihna a ni a, March thlatir maia European football club hmuhnawm ber pawl kha an ni ta lo em ni chu aw, tihpalh mai awl a ni ta.

Thawh a hun e

Liverpool-in an result ṭha lo theihnghilh a, bul ṭan ṭhat leh an duh a nih chuan, tun aia hun ṭha zawk hi a awm kher lo ang. November 2020 khan Reds hian Champions League group stage match-ah Atalanta hi an lenchilh a, 5-0 in an sawp.

Thawnthu hlui her lum a, zaninah comeback ropui an lantir theih chuan Liverpool an phur sawt ang a, Europa League-a an beiseina piah lamah Premier League-a an beiseina thlengin a vul thar leh ang - hei vang hian zanin inkhel tur hi Reds tan a pawimawh takzet.

Liverpool beiseina siam turin Atalanta hi league lamah an ropui bik lo. Thawhṭanni zan khan Serie A inkhelah Verona an mikhual a, 2-0 a hma an hruai reng hnuah si phurh sut zawh tirin, 2-2 in inkhel a tawp daih.

Merseyside club-in goal khung tumin an nawr dawn a, chutihrual chuan an inkhung ṭhelhsiak emaw tih mai tur khawpa tun hnaia an goal khung theih loh Liverpool hian an sim a ṭul - an match hnuhnung pathuma an shot neih zat belhkhawm chu 68 a ni a, goal hnih chiah an khung thung!

Beiseina neitu

Liverpool tan Diogo Jota a dam chian tak avangin Darwin Nunez aia lut tura beisei a ni a, 'comeback' an duh tak tak chuan indahṭhat hun a nih tawh loh avangin Mohamed Salah leh Luis Diaz ten bul an ṭan bawk ang.

Midfield-ah Dominik Szoboszlai, Alexis Mac Allister leh Wataru Endo te tan an theihna tak tak pholan a hun tawh a, Harvey Elliott chu lut thei dinhmunah a ding bawk. Tlarhnung laia VVD leh Ibrahima Konaté inkawp tura beisei an ni a, Andy Robertson leh Trent Alexander-Arnold ten an thlawp thei ang.

Arnold hi hliam vanga rei tak a chawlh hnuah, Palace lakah khan bench aṭangin a lut a, Palace nen an intawn ṭuma inhliam right back Conor Bradley chu kar thum tal a chawlh a ṭul avangin Arnold hian Atalanta lakah bul a ṭan nghal a rinawm.

Palace lakah Alisson lo kir leh tawhin, si ban a nghak leh tawh a, mahse, Brazilian keeper lo kir lehna match-ah an chak zo lo - tun season Europa League-a chhawr hnem zawk Caoimhin Kelleher-a'n si ban a nghak a nih pawhin a mak lo ang.

Atalanta lam hi

Serie A lamah Atalanta hi parukna an ni mek a, an league match hnuhnung berah coach Gian Piero Gasperini chuan mak takin Reds hnehtu team-a starting XI aṭangin player a thlak danglam miah lo.

Zaninah an inkhel lehnghal dawn a, an chauh leh chauh loh a hriat ang. An intawn hmasaka goal hnih khungtu Gianluca Scamacca mawlh hi ven bik ṭul tur a ni dawn a, midfielder Teun Koopmeiners pawh theihnghilh loh a ṭha ang.

Atalanta coach Gasperini chuan, "Anfield-ah khan inkhel a la tawp lo tih kan hria a, Ningani zan inkhel hi kan khawpui, club leh player tan hun pawimawh tawpkhawk a ni dawn.

"Match hmasa ang thoin khelh ṭhat a ṭul ang tih kan chiang a, mahse, kan hmaa inchhawp hi a ropui em avangin thatho takin kan bei thei ang tih ka chiang a ni," a ti a, Liverpool lakah hnehna hlado chham nawn a inbeisei.