Hnehna nen Nadal a lo kir

Rafael Nadal chuan a sawi lawk ang ngeiin nuam ti takin tennis a khel thei ve leh ta. Hliam damkawr hi Barcelona Open-ah a lo kir a, a match hmasa berah Flavio Cobolli chu straight set hmangin a hneh.

Thawhlehni zan inkhelah Nadal hian hna hautak a hmachhawn lem lo. June thla maia kum 38 tling tur hian Italian tlangval hi 6-2, 6-3 in a hneh a, kumin January thla hnua match pangngai a khelh lehna hmasa ber a ni.

Nikum Australian Open khan Nadal hi a inhliam a, season a hmang zui lo. Kumin tir khan Brisbane International-ah a rawn inlan ve leh zuai, a nihna takah chuan season khat leh a chanve vel chu inkhel loin a awm tawh.

Grand Slam vawi 22 champion tawh Nadal chuan, "Kan inkhel en turin stadium khat tlatin an lo kal khawm a, match hmasa ber aṭanga hetianga thlawpna ṭha dawn chu a hluin a lawmawm takzet.

"Kan inkhelh hma aṭang tawh khan min ṭantute hmel ka hmuh khan ka lungawi tawh, anni khan chakna nasa tak min pe a ni," a ti. Nadal inkhelhna hmun hi ama hming chawia phuah Pista Rafa Nadal niin mipui 8,500 an leng.

Nikum French Open aṭanga a inhnuhdawh dawn khan Nadal chuan kum 2024 hi professional player a nih hun hnuhnung a nih a rin thu a lo sawi tawh, a taksa dinhmunin a zir a nih erawh chuan hun rei zawk a la inkhel chhunzawm ve thei bawk.

A inkhelh loh rei em avangin Nadal hi a ranking pawh a hniam ta hle, world number 644 niin wildcard hmang lo chuan qualifying aṭanga inlan ngai tur a ni. A ranking hniam deuh mah se Barcelona Open hi vawi 12 a champion tawhna hmun a ni a, midang tan hmachhawn a châkawm loh ang.

Service chungchang sawiin Nadal chuan, "Thla khat aia rei service thei loin ka awm a, tunah chuan ka service thei a ni satliah lo a, match pangngai ka khel thei, ka tan chuan lawmna tur a ni," a ti. Aces siam miah lo mah se a khelh danah a lungawi hle.

Inkhel dangah Andrey Rublev erawh a chak lo. Russian tlangval hian Brandon Nakashima chu 6-4, 7-6 (6) in a hneh lo a, tun hnaiah a khel ṭha lo thei hle, a chak lo thinrim hian a racket a vaw chhe hial a ni.