Warriors tlak laiin Lakers an tlang

NBA playoff khel turin Los Angeles Lakers an tlang a, hetih lai hian team hmuhnawm ni ṭhin Golden State Warriors erawh a thiam zual pariat zinga tel turin an tling zo ta lo, an zinkawng a tawp.

Nimin zing NBA play-in inkhelah Lakers hian LeBron James-a point 23 hmangin New Orleans Pelicans chu 110-106 in an hneh. Western Conference play off-ah Lakers hian NBA champion lai Denver Nuggets an hmachhawn leh ang.

Kum 39 mi James hi hun pawimawhah chuan innghahna tlak a la ni reng. Point a neih tam bakah rebound vawi kua laiin a ṭhiante basket neih tur vawi kua bawk a siamsak a, playoff-ah chuan seeded pasarihna an ni dawn.

Lakers star James chuan, "Tunah hian team ṭha tak, thawhhona ṭha leh inlungrual tak kan nei mek. Post season hmang tur chuan kan theihna zawng zawng kan hlan a ngai a ni tih ka hria a, kan tum ram kan thleng thei hi a lawmawm," a ti.

Basketball inelna lian leh ngaihhlut ber NBA-ah hian regular season an khel hmasa ṭhin, chumi hnuah a sang zual pariatten playoff an khel ṭhin, Tun hnaiah a sang paruk an tling nghal a, hmunruak dang pahnih chu play-in hmangin an zawng ṭhin.

Tawnhriat ngah James hian NBA-ah season 21 a hmang tawh a, kuminah hian a vawi 17 nan playoff a khel dawn. Basketball court chhungah a hun hnuhnung lam a hmang ve mek a, atan a tawpna zel pawh a ni ve thei bawk.

Nimin zing play-in inkhel dangah Golden State Warriors chu Sacramento Kings lakah 118-94 in an tlawm. Kings hian New Orleans Pelicans an tum leh ang a, a chak zawk chuan playoff-ah Oklahoma City Thunder an hmachhawn leh ang.

Warriors hian tun hnaiah beisei an phak lo ṭhin hle, season hnuhnung pangaah a vawi thum nan playoff an khel phak dawn lo, heng zinga pahnihah hian play-in paltlang zo loin an zinkawng a tawp a ni, regular season hman ṭhat loh nghawng a na hle.

Stephen Curry-a'n point 22 nei mah se chak nan a tawk zo lo a, player ṭha Klay Thompson-a'n basket neih tuma a shot zinga 10 ngawt hlahin a vanneih ṭum a ni lo bawk, inkhel pawimawh leh chak ngei an ngaihnaah pawh an chak thei lo a ni.