Nomawi chawi loh chu hlawhchhamna - Kane

Champion duh vangin Harry Kane-a'n Bayern Munich a zawm a, mahse Bundesliga leh German Cup chu a chawi lo phawt - Bavarians hian season 11 chhung a zawna an lak theih league nomawi chu an hloh a ni.

Nizan khan Bayern Munich hian Champions League quarterfinal-ah Arsenal an mikhual a, an chak loh chuan tun season atana nomawi an beiseina a thamral ang, an chak a nih pawhin UCL champion tur chuan match hnih dang an la hmabak dawn.

England captain Kane chuan, "Tun season ṭha lo taka kan hman hi a tih danglam theih dan kawng khat a awm, chu chu Champions League champion kan nih in a ni. Kan champion lo a nih erawh chuan Bayern thlirna aṭang chuan hlawhchhamna a ni ang," a ti.

Kane hian Tottenham tan goal khung hnem ber nihna a chelh hial thei a, mahse nomawi a chawi miau loh avangin North London club hi a chhuahsan. Kum 30 mi a ni tawh a, kumin July thla hian kum 31 a pum ang - khelmualah chuan a hun hnuhnung lam a hmang mek.

Tun season kal laiah Kane hian Bayern Munich tan inelna hrang hrangah goal 39 a khung tawh, mimal record chu a nei ṭha. Mahse, a club tan nomawi a chawi si lo a nih chuan atan hlawhtlinna tia chhiar a harsa ang.