Clay court-a chet ṭhat beisei Gauff

Coco Gauff chuan French Open inbuatsaih nan Stuttgart Open a khel dawn a, season danga a chet fuh hleihtheih lohna clay court-ah hlawhtlinna chan theih ngei a inbeisei thu a sawi.

American tleirawl Gauff hian kum 2021 khan clay court inelna zinga pakhat Emilia-Romagna Open-ah hlawhtlinna a chang a, a hnuah French Open final a lut leh tawh bawk, mahse final-ah Iga Swiatek a ngam lo thung.

Kum 20 mi Gauff chuan, "Tun season chu clay court tournament khelh ka chakin ka phur tawh hle. A nihna tak sawi chuan clay a nih tawh hi chuan French Open hi kan thupui ber a ni ṭhin.

"Keimah ang bawkin player ṭha dangte pawhin French Open champion nih an chak dawn, tournament liana hlawhtling tur chuan a hma lama inbuatsaihna ṭha kan neih a ngai dawn a ni," a ti.

US Open champion lai Gauff hian tun hma lama a coach ni ṭhin Jean-Cristophe Faurel chu a coaching team zingah a telh a, ani hi Brad Gilbert te nen an thawkho, hei vang hian a phurin beiseina pawh a nei sang.