Super Sub Lionel Messi-a'n goal a khung ta

Barcelona tan substitute bench-ah Lionel Messi a ṭhu a, thil thleng khat tak a ni - mahse, Real Betis nena an inkhelah Messi hi bench aṭanga luhtir a ni a, goal hnih a khung zui. 

Messi luh hma hian team pahnih hi 1-1 in an inhnehtawk a, Argentine forward-a luh meuh chuan 5-2 in Barca an chak. Messi hian penalty hmanga goal a khung zet hnuah minute 82-naah a khung leh a, tun season-a penalty ni lo hmanga goal-a khung hmasak ber a ni. 

Barca tan Messi bakah Ousmane Dembele, Antoine Griezmann leh Pedri-ten goal khat ṭheuh an khung a, Barca tana Antonio Sanabria leh Loren Morón-te goal khungin awmzia a nei lo. 

Inrinni zan club luan inkhel dangah Atletico Madrid chuan 4-0 in Cádiz an sawp a, Joao Felix chuan goal hnih khungin Marcos Llorente leh Luis Suarez-ten goal khat ve ve an khung bawk. 

Nou Camp-a inkhelah Ronaldo Koeman hnuaia harhtharna chang mek Dembele chuan minute 22-naah goal hmahruai a khung a, Griezmann-a'n penalty hmanga belhchhahna remchang nei mah se hun ṭha a hlah. 

First half hun pek belhah Sanabria chuan si phurh a rawn sut a, 1-1 nichungin Barca player-ten dressing room an pan - Betis hmaa an league match hnuhnung pali aṭanga point hnih chauh hmutu Barca fans an hlauthawng. 

Barcelona rawlthar duhawm Ansu Fati chu hliam vangin second half-a inlan thei tawh lo a, tun season match 10-a khelha goal nga khungtu striker hi a chawlh chen tur he thu buatsaih thleng hian sawi chian theih a ni lo.

Mahse, Betis lakah erawh Fati inhliam hi malsawmnaah chantir a ni a, kum 18 mi rawlthar thlakin Messi a rawn lut - khelmualah minute li chiah hun a hmang hman tihin Griezmann goal khungnaah a inrawlh nghal a, 2-1 a ni. 

Griezmann-a goal khungna turah hian Jordi Alba ball pek chu Messi hian lo 'dummy' in, defender pahnih leh Real Betis keeper Claudio Bravo a bum a, vengtu nei lo Griezmann tan goal khung a harsa lo. 

Aissa Mandi-a'n Dembele khung tur a kuta a dan hnuin Barca-in penalty an hlawh a, Messi chuan goal-ah a chantir zui - 3-1 a ni a, Mandi hnawhchhuah a nih bawk avangin Barca hi chak tur chianga ngaih an ni. 

Mahse, Betis beiseina chhem nung turin Morón chuan minute 73-naah a khung ve leh a, Barca fans tan hlauhthawnna tur a awm. Mahse, Messi-a'n penalty hmang ringawta goal khung reng a duh lo. 

Sergi Roberto nen an in one-two hnuin an goal lina a khung a, tun season match 10-a khelha goal ruk a khungna niin assist vawi li a nei bawk - minute 90-naa Pedri-a'n a khung leh meuh chuan Barca an chak tih a chiang tawh. 

Diego Simeone-a'n Barcelona leh Real Madrid hliahkhuhna hnuaia awm reng an duh lo tih lantirin Cadiz lakah a naute chu 4-0 in hnehna a chanpui a, league table chung ber an luah. 

Nizan khan Real Madrid an inlan a, result kan hre hman lo - Real hian hnehna an chan chuan Atletico an lehpel leh dawn a, Simeone-a naute aiin match khatin an khel tam tih erawh hriat a ṭha. 

Atletico tan Joao Felix chuan minute riatna lekah goal hmahruai a khung a, Felix goal khung tur siamsaktu Llorente chuan minute 22-naah a chhunzawm. 

Tun season inelna hrang hranga match 10-a khelh aṭanga goal sarih khunga assist vawi thum nei thei Felix hian Suarez khung tur a siamsak zui a, minute 90-naah a hnu a khar - Suarez hian Atletico-a pan hnuah match kua khelin goal nga a khung a, assist vawi khat a nei tawh a ni.