Portsmouth-in Championship khel dawn

Premier League club vantlang ni ṭhin Portsmouth pawh an mangchhia aṭangin an harh mek - Thawhlehni zan khan League One inkhelah Barnsley chu 3-2 in an hneh a, season thar aṭang chuan Championship an khel ve leh tawh dawn.

Barnsley hian Devante Cole leh John Mcatee hmangin vawi hnih ngawt hma an hruai a, mahse, Portsmouth hian Kusini Yengi, Colby Bishop leh Conor Shaughnessy hmanga chhangletin, 3-2 in hnehna an chang a, league match hnih khelh tur la nei mah se, um phak theih an nih tawh loh avangin an champion chiang tawh.

Portsmouth hian 2003-10 chhung khan Premier League-ah hun an lo hmang tawh a, mahse, kum 2008-a FA Cup nomawi chawitu team hi 2010 hnuah an kir leh lawk thei tawh lo - League Two thlengin an khel hman!

Coach John Mousinho hi kum 37 mi chauh la niin, January 2023 khan Portsmouth hi a coaching career-a a club hmasa ber ni turin a zawm - a zawm tirh hian League One table-ah 15-na an ni a, match 11 zet a zawna tlawm nei loa a kalpui hnuah pariatna niin season an khar.

English coach Mousinho hnathawh hi a ropui hle. Tun season-a league match 44 an khelh tawhah vawi 27 chakpuiin, vawi 13 draw an nei a, vawi li chiah an tlawm - pahnihna Derby County tan um phak theih an ni tawh lo.

League One-ah hian team 24 inelin, a sang pahnih chu Championship khel turin an kai nghal ṭhin a, pathumna aṭanga paruknaten playoff khela hmun ruak pakhat inchuh lehin, table mawng lam team palite chu League Two-ah an tla ṭhin.