Season tawp thleng atan Keita an hrem

Liverpool midfielder hlui Naby Keita chu a club khelh mekna Werder Bremen chuan season tawp thleng atan inkhel thei lo turin an hrem a, sum ṭhahnem tak an chawitir bawk.

Kum 29 mi Keita hi Pathianni zana Leverkusen nen an inkhel turah khan bul a ṭan dawn loh avangin a zin ve duh lo a, Keita hian a tirah a ṭhiante ruala zin tum mah se, bul a ṭan dawn loh avangin haw a thlang ta zawk a ni.

Bremen football director Clemens Fritz chuan, 'Naby-a chet dan hi pawm zam theih a ni lo a, tun hnaia kan result avanga team kan hnual leh puih kan ngaih em em laiin, club tana ṭha tur aiin a mimal duh dan a ngai pawimawh zawk a ni," a ti.

Clemens Fritz chuan sawi zawmin, "Khatiang ang thil kha a thlen nawn kan rem ti lo. Tun ang boruakah chuan, hmabak inkhela rilru pe a, thawk ho tur team kan mamawh a, Naby hian duhthlan tur dang min pe lo a ni," a ti a, a chunga hremna na tak an lekkawh chhan a sawi.

Guinea international Keita hi first team training a zawm pawh phalsak a ni lo a, season tharah a chhuak daih lo ang tih a sawi theih loh. Keita hian Liverpool-ah season nga a khelh hnuin, June 2023 khan Werder Bremen hi a zawm a, mahse, league match nga chiah la khelin, match khatah chiah bul a la ṭan.