Madrid Open atan Alcaraz a chiang lo

Hliam vanga chawl mek Carlos Alcaraz chu thun thla tawpa khelh tur Madrid Open atan a dinhmun a chiang lo, tuna inelna neih mek Barcelona Open pawh a khel thei lo a ni.

Spanish star hi a ban dinglam hliam vangin a chawl mek a, clay court inelna pahnih Barcelona leh Madrid Open-ah te hian champion lai a ni ve ve, a inlan loh chuan nomawi bakah ranking point a neihsa pawh a humhim thei dawn lo.

World number 3 Alcaraz chuan, "Ka dinhmun hi a la ṭha lo, chutihrualin Madrid Open hma hian damna hun chu ka la neihah ka ngai. Ka duh leh beisei ang hian ka dam hman kher ang em tih erawh ka sawi lawk thei bik lo a ni.

"Theih ni se la chuan Madrid Open khelh ngei ka duh, min enkawltu ten theihtawp an chhuah reng bawk a, engkim a ṭhat leh hun ka nghakhlel hle. Dam chiang lo chunga inkhelh luih erawh ka ngam lo," tiin 100%-a dam phawt a tum.

Madrid Open hi April 24 aṭanga May 5 thleng khelh a ni daswn a, chumi hnuah clay court inelna lian French Open an khel zui ang. Paris khawpui pan thei tur chuan Alcaraz tan Madrid Open khelh hmasak a pawimawh hle.