Champions League Real laka fiahna hmachawn tur City
Zanin dar 12:15 hian Real Madrid chuan an khelmual San-tiago Bernabeu-ah Champions League semifinal second leg khel turin Manchester City an lo mikhual dawn a, inkhel hmuhnawm a ni ang.
April 27 zanlai khan team pahnihte hi Etihad Stadium-ah an lo inhmachhawn tawh a, goal awm loin an inhnehtawk. Zaninah erawh final khelhna tur Milan, Italy pan tur zawk chinfel a ni dawn. Real player hlui Zinedine Zidane-a'n coach hna a thawh kum khatnaah Europe-a ropui a tum nghalna hi City manager kalchhuak tur Manuel Pellegrini tan awlsam taka thlir liam ngawt chi a ni bik lo ang.
Real Madrid hi an chak a nih chuan Europe club competition-a final vawi 14 an luhna tur a ni tawh dawn! Hetihlai hian Manchester City erawh last 16 an paltlang ringawt pawh kha an club chanchina an thlen san ber ṭhum a ni tawh a, kuminah hian Pellegrini naute hian history ṭha ber ziah theihna hun ṭha an nei mek.
Ta se...
Cristiano Ronaldo tel lo chuan Real Madrid leh Man City te hi team intiattawk an ni tih kan hmu tawh. Ronaldo tel ta se City tlarhnung hian an veng zo ang em? tih chu zawhna lian tak a ni.
April 20-a Villarreal 3-0 a an hneh ṭum khan Manchester United forward hlui Ronaldo hi a malpui a hliam a, La Liga game hnih bakah semifinal first leg kha a khel thei lo tawh. Mahse, Thawhṭanni khan training zawm leh tawhin zanin hian a inlan a nih chuan danglamna siam thei a nih zia chu inhrilh nawn ngai loin kan hre sa vek.
Kum 31-a upa Ronaldo hian Champions League-ah goal 93 khung tawhin Champions League chanchina goal khung hnem ber a ni mek a, tun season-ah pawh inelna hrang hrangah a club tan goal 47 khung tawhin Champions league inelna bikah chauh hian goal 16 khung tawhin ani aia pet goal tam an awm lo.
Real hian first leg-a malpui na vanga thlak ngai striker Ka-rim Benzema pawh an chhawr theih dawn leh dawn loh a chiang lo a, France international hian Thawhṭanni khan training zawm ve mah se beisei angin a hliam a la dam lo. Brazilian midfielder Casemiro erawh kartawpa Real Sociedad 1-0 a an hneh ṭumin hliam tuar mah se City hmachhawn thei tura ngaih a ni.
Ronaldo leh Benzema te an inlan thei lo a nih pawhin Real Madird hi khawvela player man to ber Gareth Bale neitu an nih avangin chiai lutuk tur erawh an ni lo. An match hnuhnung bera Real Sociedad an hnehna goal awmchhun khungtu Bale hian a club tan tun season-ah inkhel bul a ṭan vawi 20 aṭangin goal 19 a khung tawh a, La Liga leh Champions League nomawi bei-sei thei dinhmunah a din pui mek.
Real Madrid hi La Liga lamah Barcelona leh Atletico Madrid te chetsual chang chauh an nih tawh rih avangin tun season-a an nomawi beisei awm chhun ni tawhah hian final luh an tum ruh hle ang tih a chiang.
City tlarhma hi
Premier League striker hlauh-awm ber pawl Sergio Ague-ro hi tun hnaiah Champions Lea-gue-ah a hlauhawm tawk lo. Argentina international hian tun season-ah a club tan inelna hrang hrangah goal 28 khung tawh mah se Champions League bikah chuan February thlaa Dynamo Kiev laka goal a khung hnuah minute 432 chhung zet goal zawnah a pet tawh lo!
Champions League match li chhung goal a khung tawh lo a, he inelnaah bik hian kum 2011 November leh 2012 October inkara match nga chhung goal a khung loh hnua a chet fuh lo zawn rei ber ṭum a tawng mek.
Pathianni zan Premier Lea-gue-a Southampton 4-2 a an hneh loh ṭumin Chile manager Pellegrini-a'n Aguero hi bench-ah a ṭhut chawlh tir a, midfielder Yaya Toure leh defender Vincent Kompany te chu squad-ah pawh a telh lo hial. Heng player pathumte hi City inkhel khaikhawm ṭhintu an ni a, final an luh theih nan chuan an khelh ṭhat a ṭul dawn.
First leg-ah playmaker David Silva a inhliam avangin Kevin De Bruyne a pawimawh hle ang. Hliam vanga hun rei tak a chawlh hnuah Belgium international hian quarterfinal-a Paris Saint-Germain an hneh
ṭumin goal a khung nghe nghe.
Real Madrid hi English club lakah an chesual khat hle a, tun hnaiah vawi riat an hmachhawn aṭangin ṭum ruk hnehna changin vawi hnih an inhnehtawkpui. City hian final lut tur chuan English club ten tun hnaia an tih theih loh an tih a ṭul dawn a ni.