Roma fapa rangkachak Totti a inlar

AS Roma forward Francesco Totti chu a kum tam deuh tawh mah se khelmual chhungah a la tar lo tih a lantir zel a, Thawhṭanni zan khan Genoa lakah freekick aṭanga goal khungin a club hi 3-2 in hnehna a chanpui.

Stadio Luigi Ferraris-a inkhel-ah Roma tan Mohamed Salah chuan minute rukna lekah goal hmahruai a khung a, Genoa hian Panagiotis Tachtsidis leh Leonardo Pavoletti te goal hmanga chhangletin 2-1 in hma an hruai let.

Mahse, bench aṭanga rawn tlan lut kum 39-a upa Totti chuan minute 77-naah freekick kawh zeta pet lutin an si phurh a sut a, forward Stephan El Shaarawy chuan hun tawp hma minute thum chauh a awm tawh tihah an chakna goal a khung bawk.

Totti hian tun hnai a match hnuhnung paliah goal li a khung ta a, heng a goal khung zawng zawng hi substitute bench aṭanga a tlan luh aṭanga a khung vek an ni.

Roma hi tun hnaiah an khel ṭha tluang viau a, league match an khelh hnuhnung 15 aṭangin hneh loh an tawng tawh lo. League match 36 khelh tawh
aṭanga point 74 hmuin pahnihna Napoli nen an inthlauhna chu point hnih chauh niin inkhelh hmabak pahnih a la awm.

Inkhel dangah Napoli tana hrem tuar zo hlim striker Gonzalo Higuain-a'n khelmual chhungah goal khung thiam bik a nih zia a pholang nawn leh. Argentina international hian Atalanta lakah goal hnih khungin a club 2-1 in hnehna a chan pui. Real Madrid player hlui hian tun season Serie A khelh mekah goal 32 khung tawhin ani aia khung tam an awm rih lo.

Italian Serie A club 20 zing aṭang hian champion Ju-ventus bakah pahnihna chuan Champions League an khel dawn chiang a, pathumna hian playoff an khelh a ngaih dawn avangin Roma leh Napoli hi inthlahdah thei an la ni lo.

'Prince of Rome'

AS Roma chanchin an sawi apianga an sawi hmaih loh tur leh lamrik hmasak ber turte zinga mi chu 'Prince of Rome' tia hming lem an vuah Totti hi a ni. Italy legend hian senior career-ah Roma bak club dang a la nei lo. Kum 1992 khan khel ṭanin kum 1998 October 31 a her chhuah meuh chuan kum 22 mi chauh niin Totti chu Roma club chanchina captain naupang ber a ni hial.

Italy tan pawha match 58 khel tawh Totti hian Roma tan Serie A title bakah Coppa Italia title leh Supercoppa Italiana title pahnih ve ve a lo chawi pui tawh. Roma tan hian league match 599 khel tawhin ani aia khel tam an awm lo a, goal khung 248 zet a khung bawkin ani aia pet goal tam an awm lo.

Roma coach Luciano Spal-letti chuan, "Totti hian vawi tam tak hlimna leh lawmna min lo thlen tawh ṭhin a, a la thlen zel pawh ka beisei. Genoa laka a goal khungte kha midangin an tih ve theih zen zen loh a ke dinglam khan a ti thei tlat a ni. Ani hi chu mi danglam bik a nih vang hian inkhela danglamna thlen thei a ni," tiin a sawi.

Pathianni tlaiah Roma hian Chievo an lo mikhual dawn a, hemi hma hian Totti hian a club-ah hian contract a pawhsei hman beisei a ni.