Season thara Premier League khel tur Burnley

Thawhṭanni zan khan Burnley chuan Sam Vokes goal thun hmangin Queen Park Rangers 1-0 a hnehin umphak theih an ni tawh lo a, season tharah Premier League an khel dawn.

Season hmasaa Premier League aṭanga relegate Burnley-in ni 359 hnuah England rama league sang ber an khel leh dawn ta a, league match 46 khelh tur awmah vawi 45 khel tawhin point 90 an hmu.

An hnuaia awma point 88 ve ve hmu Middlesbrough leh Brighton-te chu match khat chauh khelh tur an neih tawhah an inhmachhawn dawn avangin Burnley hi umphak theih an ni tawh lo a ni.

Burnley hian season hmasaa an relegate khan nipui transfer-ah an striker rinrawl Danny Ings chu Liverpool lakah an chan a, full-back Kieran Trippier chu Tottenham lakah chanin captain Jason Shackell chuan Premier League khelh tuma sum inseng nasa Derby County lam a pan san bawk.

Mahse, Bunrley hian fing taka player la lutin tawnhriat nei ngah Joey Barton chu midfield khai-khawmtu a ni a, an club chanchina player man to ber ni tura an lak-luh pound maktaduai 6 man Andre Gray chuan a man to chhan tarlangin vawi 40 inlanah goal 22 a khung.

Burnley tan goalkeeper Tom Heaton chu an innghahna a ni bawk a, England squad-ah hial an koh keeper hian vawi 45-a inlanah match 19 zet goal a chhuah lo thei.

Manager thukhawchang

Burnley manager Sean Dyche chuan, "Rim takin kan bei a, kumin zet chu club hrang hrang an insen nasat avangin a harsa takzet. Mahse, engkim a inbuk tawk vekin kan ti a, hei lo liama lawmna nasa zawk a awm thei lo," tiin a hlim hle.

Premier League khel tur dang

Championship-a pakhatna leh pahnihna chinin Premier League an khel dawn chiang a, Burnley an tlin tawh avangin Middlesbrough leh Brighton-te chuan playoff khelh ngai lo turin hmun ruak pakhat la awm hi an inchuh ang.

Table-a palina aṭanga parukna chinin playoff semifinal an khel ang a, final-a team pahnih inhma-chhawna chak zawk zawkin hmun ruak pakhat la awm an inchuh ve leh dawn bawk a ni.