United player ṭha ber De Gea

David De Gea chuan Sir Matt Busby Player of the Year award a dawng a, season thum a zawna Manchester United Player of the Year chawimawina dawng thei hmasa ber a ni. Premier League-a panganaa awm mek United chuan Thawhṭanni zan khan Old Trafford-ah Awards Night an hmang.

Spanish keeper hian Premier League match 32 a inlanah match 14 goal a chhuah lo a, PFA Team of the Year-ah thlan a lo ni tawh bawk. United no. 1 keeper hian 2014 leh 2015 khan he chawimawina hi lo dawng tawh a, chawimawina vawi thum dawng thei dang chu Cristiano Ronaldo (2004, 2007, 2008) chiah niin Portuguese forward erawhin kum zawnin a dawng lo thung.

Kum 25-a upa De Gea chuan, "Lawmman ka dawn theih chhanah hian dressing room-a awm zawng zawng an pawimawh vek a, an vai chungah lawmthu ka sawi vek. Tunah chuan Wembley Stadium-a nomawi chawi turin kan inpeih a ṭul a, FA Cup-a kan champion a nih chuan season ṭha tak a ni ang," tiin a sawi.

Tun season-a inelna hrang hrang match 50 chuanga inlan defender Chris Smalling chu Player's Player of the Year a thlan a ni a, English defender hian Wayne Rooney leh Michael Carrick te awm loh ṭumin captain armband a hreng ṭhin bawk.

Anthony Martial-a'n United tana a khelh hma-sak ber ṭumin Liverpool lamah goal ropui a khung a, Reds lama French forward goal hi Goal of the Season a thlan a ni. United rawlthar duhawm Martial Rashford chu Jimmy Murphy Young Player of the Year-ah thlan a ni a, wing back Cameron Borthwick-Jackson chu Under-21 Player of the Year-ah thlan a ni bawk.

Warren Joyce-a en-kawl United U21 hian tun season Barclays U21 Premier League-ah an champion a, U21 inelna hi 2012/13 season khan ṭan niin United hi champion hmasa ber an nih bakah vawi thum champion thei awmchhun an ni a, Chelsea U21 team-te vawi khat an champion ve tawh bawk.