Premier League champion Leicester City

Leicester City chu infiamna khawvel chanchin ropui ber zinga chhiar tel ni reng tawh turin Premier League champion an ni.

Thawhṭanni zan khan Totten-ham Hotspurs leh Chelsea te chu 2-2 in an inhnehtawk. London Derby result vang chauhin Foxes hi an champion a ni lo a, Claudio Ranieri hote hi Spurs-in point thum an hlawhchhuah zawh loh vangin an champion hun a hma hret tihna a ni zawk.

Ringlote tan beiseina

Leicester City hi season liam ta khan relegate tura ngaih an ni a, English manager Nigel Pearson hoin an him hram.

Season thar atan Foxes an inpuahchah a, Thailand-a an tour-naah manager fapa James Pearson leh rawlthar dang pahnih chu hotel-ah an chet mawi loh vangin an ban. Hemi hnu hian club neitu Thai pachal Vichai Srivaddhanaprabha (King Power chairman) nena intih thiam loh vangin manager Nigel Pearson-a'n hna a chan bawk.

Pearson thlak turin Foxes-in Italian manager Claudio Ranieri an la lut a, English manager hi chhandamtu an nih miau avangin an manager thar hi sawisel lo an awm lo. Leicester legend Gary Lineker phei chuan, "Ranieri hi coach tawnhriat nei ngah tak chu a ni ngei a, mah se Leicester thutlukna hian beisei a ti chau hle. Hming langsar coach ten club hrang hrang an enkawl kual reng hi a mak a ni," tiin a sawi.

England striker thlirna hi a hunlai chuan a mak lo a, football chanchin zir uluk ber zinga ngaih pawisa thapna lam pawhin Leicester hi an champion an ring lo.

Season ṭantirh khan Leicester champion odds chu 5000/1 a ni a, chumi awmzia chu Foxes champion tura Re 1 dah chuan season tawpa nomawi an chawi chuan Rs 5000 an dawng dawh tihna a ni. Pawisa thapna buatsaihtute hian Foxes hi champion turin an ring lo bur tihna a ni a, club 20 zinga a ṭha ber an nih theih dan chu .0002 percent chauh a ni.

Ultimate Fighting Champion-ship-a Holly Holm-i'n title kawltu Ronda Rousey a hneh khan khawvel barakhaih mah se Rousey chak tura an dah dan chu 8/1 chauh a ni. Kum 1990-a Buster Douglas-a'n boxer zinga ropui ber zinga ngaih Mike Tyson a hneh kha mak viau mah se betting odd lamah chuan 42/1 a ni pha chauh.

Leicester an ring lo tak tak tichiangtu erawh reality tv judge lar leh tv producer lar Simon Cowell-a British prime minister a nih theih dan odds chu 500/1 a ni pha chauh a, actress lar Kim Kardashian-i US president nih theih dan odds pawh 2000/1 a ni. Italian manager Claudio Ranieri hote hi season tir lam khan champion an rin loh dan lutuk hi awihawm lo zawk a, chutihrualin an squad thlirin a mak si lo.

Football lamah let ila, 2004 European Championship-ah Greece an champion. Inelna ṭan hmaa Greek national team champion theih dan tura an rin dan chu 150/1 a ni. Leicester hian rinkai an nih loh vangin an tum an ṭhulh duh lo a, tunah chuan kum 1884-a din Foxes hi an club chanchina a vawi khat nan an champion.

Leicester hian football club leh player-te tan entawn tur ṭha tak an hnutchhiah a, football ropuina an belhchhah ni ringawt loin an thawnthu ngaihnawm tak hi nitin nun thlenga chhawm tlak a ni.

Vardy in lamah

Football Writers' Association chuan Thawhṭanni khan tun season chhunga footballer of the year atana an thlang an puang a, Leicester City striker Jamie Vardy chuan chawimawina hlu tak hi a dawng.

Kum 29-a upa Vardy hian tun season-ah Foxes tan inelna hrang hrangah vawi 36 a inlan a, goal 22 a khung. Leicester City player-te chuan Melton Mowbray-a Vardy inah Chelsea leh Tottenham Hotspurs te inkhel an en ho a, pawn lamah supporter-te'n ruahsur hnuaiah an ṭawiawm bawk.

Leicester captain Wes Morgan chuan, "Nomawi chawi hun ka nghakhlel takzet a ni. Hetiang anga team boruak ṭha hi ka la tawng ngai lo a, kan vaiin kan thawkrim a ni. Premier League champion turin min ring ngai lo a, mah se tunah chuan Premier League champion kan ni a, kan phu a ni. Mipuiin nikuma kan khel kha an hmu a, relegate turah min dah mah se keini chuan an ring sual tih kan lantir thung," tiin an champion zawhah a sawi.

Ranieri a lawm

Thawhṭanni khan Leicester City manager Claudio Ranieri chuan a nu tlawhin Italy a pan a, amaherawhchu Tottenham leh Chelsea result hre hman turin Eng-land-ah a kir niin sawi a awm bawk.

Kum 64-a upa Ranieri chuan, "Thil thleng thei tur bak ka ngaihtuah ngai lo. Season ṭantirh khan match khat zel chak kha kan tum a ni a, kha bak kha kan ngaihtuah ngai lo. Tuna kan thlen chin erawh a ropui ka ti a, awm thiam a har hle. Player-te'n fak an phu a, match tinin chak tumin an theihna zawng zawng an chhuah
ṭhin. Player, chairman, staff, fans leh Leicester chhungkua zawng zawng hlimna hi ka ṭawmpui a ni," tiin an champion chungchang a sawi.

Pound maktaduai 150?

Leicester hian an champion avangin season tharah pound maktaduai 150 an neih belhchhah thei dawn niin sports data leh markerting company zirchianna lama rintlak Repucom chuan an chhut.

Foxes hian Premier League champion lawmman, Champions League tel vanga pawisa hmuh leh match tina ticket aṭanga an pawisa hmuh te chu a tam sawt tura chhut a ni a, khawvel hmun hrang hrangah suppporter an pun sawt dawn avangin sumdawnnna lamah an hlawk chho dawn a; sponsporship aṭangin pawisa an la lut tam sawt dawn niin chhut a ni bawk.

Champion phu

Leicester City hian match 36-ah point 77 an hmu a, match hnih khelh la hmabakah anmahni hnaih bertu Tottenham Hotspurs in an umpha thei tawh lo.

Club captain Wes Morgan-a'n Championship trophy (first division) a chawi aṭanga kum hnihnaah Premier League nomawi a chawi dawn a. Claudio Ranieri hote hian January 23 aṭangin Premier League hmahruaitu an ni ngar ngar a ni.

Foxes hi tun season-ah vawi thum chauh chak loin Arsenal leh Liverpool chiah hneh loh an tawng a, match 15-ah goal an chhuah lo a, Italian manager hote hian season tawp pressure san laiin an che
ṭha lehzual a, Leicester City hian champion an phu a ni.

Leicester City

Hlawhtlinna Kalkawng

Sunderland Bournemouth

H : 4 - 2 (W) H : 0 - 0 (D)

West Ham Tottenham

A: 1 - 2 (W) A : 0 - 1 (W)

Tottenham Aston Villa

H : 1 - 1 (D) A : 1 -1 (D)

Bournemouth Stoke City

A : 1 - 1 (D) H : 3 - 0 (W)

Aston Villa Liverpool

H : 3 - 2 (W) H : 2 - 0 (W)

Stoke City Man City

A : 2 - 2 (D) A : 1 - 3 (W)

Arsenal Arsenal

H : 2 - 5 (L) A : 2 - 1 (L)

Norwich Norwich

A : 1 - 2 (D) H : 1 - 0 (W)

Southampton West Brom

A : 2 - 2 (D) H : 2 - 2 (D)

Crystal Palace Watford

H : 1 - 0 (W) A : 0 - 1 (W)

West Brom Newcastle

A : 2 - 3 (W) H : 1 - 0 (W)

Watford Crystal Palace

H : 2 -1 (W) A : 0 - 1 (W)

Newcastle Southampton

A : 0 - 3 (W) H : 1 - 0 (W)

Man United Sunderland

H : 1 -1 (D) A : 0 - 2 (W)

Swansea West Ham

A : 0 - 3 (W) H : 2 - 2 (D)

Chelsea Swansea City

H : 2 - 1 (W) H : 4 - 0 (W)

Everton Man United

A : 2 - 3 (W) A : 1 -1 (D)

Liverpool Everton

A : 1 - 0 (L) H : May 7

Man City Chelsea

H : 0 - 0 (D) A : May 15