Hazard-a'n Tottenham beiseina a titawp

Thawhṭanni zan khan Tottenham Hotspurs-in champion beiseina chhawm nun zel tumin Stamford Bridge an tlawh a, season liam ta Premier League player of the year Eden Hazard goal hmangin Mauricio Pochettino hote beiseina a thamral.

Spurs-in kum 1961 hnuah Premier League nomawi an la chawi leh lo a, inkhel bul pawh an ṭan ṭha. Harry Kane (35') leh Son Heung-min (44') hmangin mikhual team-in hma an hruai a, 2-0 in first half a tawp.

London Derby-ah Chelsea-in chak loh an hreh a, Gary Cahill (58') leh Eden Hazard (83') hmangin an siphurh an sut. Belgian winger hian a thiam a la theihngilh lo a, Hazard goal ropui hi Chelsea point khat hlawhchhuahna bakah Leicester City hlimna siamtu a ni.

Chelsea ṭantute chuan an manager hlui Claudio Ranieri lawmpuina thuziak an an pho chhuak a, tun season match hnuhnung berah season liam ta champion Blues hian champion thar Leicester City an mikhual ang.

Spurs boss Mauricio Pochettino chuan, "Foot­ball a ni a, patling kan ni a, anni pawh patling an ni. Kan huaisen tih kan lantir a ṭul a, nomawi chawi loh vangin hnual mah ila kan thlen chin hi a ropui tih kan hriat a ṭul a ni. Spurs player-te hi naupang tak tak a ni a, season tharah ṭha takin kan khel leh thei ang. Kan thlen chin hi kan chhuang a, kan supporter-te pawhin kan rilru puthmang hi min ṭawmpui a ṭul a ni," tiin an thlen chinah a lungawi thiam hle.